Эканамічны прагноз: дэвальвацыя пагражае, і нават у хуткім часе

Штучна зрабіць долар танейшым за 3 рублі Лукашэнка можа, але гэта будзе мець негатыўныя наступствы. Пра гэта ў эфіры Еўрарадыё кажа эканаміст Уладзімір Кавалкін:  

“У такім выпадку мы пабачым і скарачэнне экспарту, і запавольванне ВУП, і шмат іншых праблемаў. З эканамічнага пункту гледжання лепей зрабіць 3,4 рубля. Зразумела, што людзі збяднеюць, але хто ў адміністрацыі Лукашэнкі клапоціцца пра звычайных людзей? Ёсць АМАП: калі ёсць незадаволеныя, то можна іх пабіць. З пункту гледжання папулізму можна зрабіць долар і ніжэйшым за 3 рублі, але тады будуць назапашвацца крызісныя дысбалансы, якія потым могуць скончыцца на курсе і 4, і 5 рублёў. Мы гэта бачылі ў гісторыі Беларусі і ў 2011-м годзе, і ў 2015-м”.  

Што будзе з інфляцыяй у Беларусі?

“Вялікая інфляцыя была летась у пачатку ваенных дзеянняў. І калі параўноўваць гэты і мінулы год, то атрымліваецца, што інфляцыя была не такая высокая, бо яна спрацавала год таму. Але гэты чыннік сябе вычарпае вельмі хутка, і інфляцыя пойдзе ўверх — гэта абсалютна зразумела. Калі казаць пра грашовую масу і рух расійскага рубля, то ўсё сведчыць пра тое, што будзе дэвальвацыя, а разам з ёй — і інфляцыя, бо імпартныя складнікі будуць даражэць, што адразу паўплывае на сабекошт тавараў і цэны ў Беларусі”.