"Экстрэмісцкім" прызналі лагатып брытанскага брэнда адзення

Лагатып брытанскага брэнда адзення Boy London прызнаны ў Беларусі "экстрэмісцкім матэрыялам". Адпаведнае рашэнне прыняў у лютым суд Цэнтральнага раёна Гомеля.

На лагатыпе паказаны арол з распасцёртымі крыламі, які трымае ў лапах літару "О" са слова Boy. 

У беларускай пракуратуры вырашылі, што гэты лагатып падобны да выявы "партыйнага арла" Нацыянал-сацыялістычнай рабочай партыі Германіі. Адзенне з такой сімволікай, мяркуюць у пракуратуры, "спрыяе ўзнікненню канфліктаў на расавай, нацыянальнай, рэлігійнай альбо іншай сацыяльнай глебе", а таксама "нівелюе нецярпімасць да нацызму".

Вопратку канфіскавалі з продажу, а суд забараніў яе нашэнне.

Дарэчы, сам брэнд адмаўляе сувязь лагатыпа з нацысцкай сімволікай і тлумачыць яго паходжанне арлом Рымскай імперыі.