Хакеісты мінскага "Дынама" прайгралі "Северсталі", хаця вялі з лікам 2:0

Хакеісты мінскага "Дынама" ў Чарапаўцы ў рамках чэмпіянату КХЛ сустракаліся з мясцовай "Северсталлю". Гульня скончылася перамогай гаспадароў — 3:2.

Пасля другога перыяду "зубры" вялі з лікам 2:0, але ў трэцім перыядзе прапусцілі адразу дзве шайбы. У авертайме мінчукам доўгі час прыйшлося дзейнічаць у меншасці. Аднак лёс гульні быў вырашаны ў серыі пасляматчавых булітаў: мацнейшымі выявіліся хакеісты "Северсталі".

У турнірнай табліцы Заходняй канферэнцыі "Дынама" займае сёмы радок, маючы ў актыве 13 ачкоў пасля 12 матчаў. "Северсталь" размяшчаецца на пятым месцы — у яе 16 балаў.

Выязную серыю "дынамаўцы" завершаць 10 кастрычніка ў Санкт-Пецярбургу — іх чакае сустрэча з мясцовым СКА.