Ключавыя словы — "законная юрысдыкцыя". Што Лукашэнка прапанаваў Прыгожыну?
"Вагнераўцаў" у любым выпадку адправяць на фронт / AFP via Getty Images
Па словах Яўгена Прыгожына, "вагнераўцы" пайшлі на "Марш справядлівасці" праз патрабаванне заключаць кантракты з Мінабароны Расіі. Гэта пагражала знішчэннем вайсковай кампаніі.
Ізноў жа, па словах Прыгожына, цяпер праблема вырашаная. А вырашыць яе дапамог Аляксандр Лукашэнка, які "прапанаваў знайсці шляхі для далейшай працы ПВК "Вагнер" у законнай юрысдыкцыі". Выглядае на тое, што праблема "вырашаная" наступным чынам. ПВК "Вагнер" атрымае беларускую "прапіску" і працягне ваяваць ва Украіне. Так патрабаванне заключаць кантракты з Мінабароны РФ адпадае само сабой.
Гэтая версія грунтуецца на тым, што словы "законная юрысдыкцыя" Прыгожын сказаў у сваім 11-хвілінным звароце не проста так. Не дужа сур'ёзная падстава для сур'ёзных высноваў, але.
У выпадку, калі наша версія пацвердзіцца, "25 тысяч вагнераўцаў" у Беларусі знаходзіцца не будуць. Максімум — тут з'явіцца яшчэ адна-дзве трэніровачныя базы. І дадатковага ціску з поўначы на Украіну не будзе таксама — найміты будуць ваяваць на поўдні.
Але дэ-юре глыбіня ўдзелу Беларусі ў вайне істотна павялічыцца. З'явяцца новыя законныя вайсковыя цэлі на нашай тэрыторыі — лагеры расійскіх наймітаў у Беларусі. А таксама не выключана, што знойдуцца грамадзяне Беларусі, якія захочуць далучыцца да іх.
