Літва забароніць ездзіць у Беларусь тым, хто працуе з сакрэтнай інфармацыяй

Службовым асобам Літвы, якія маюць доступ да сакрэтнай інфармацыі, плануюць забараніць паездкі ў Беларусь і Расію. Абмежаванні могуць закрануць каля 56 тысяч дзяржслужбоўцаў. Пра гэта паведамляе LRT, спасылаючыся на кіраўніка Нацыянальнага цэнтра кіравання крызіснымі сітуацыямі краіны (NKVC) Вільмантаса Віткаўскаса.

Адпаведныя змены ў закон "Аб дзяржаўнай і службовай таямніцы" распрацоўвае Міністэрства абароны краіны. Такія меры ш Літве тлумачаць актывізацыяй дзейнасці беларускіх спецслужбаў на мяжы.

Прадстаўнікі Літвы спасылаюцца на тое, што на беларускіх памежных пунктах пропуску літоўскіх грамадзян дапытваюць, аказваюць на іх псіхалагічны ціск і шантажуюць, прымушаючы да супрацы.

Як паведамлялася раней, у жніўні Літва зачыніла пункты пропуску "Шумскас" і "Цвярачус" на мяжы з Беларуссю.