Малады ліберал Забароўскі сыходзіць з Міністэрства эканомікі?
![Малады ліберал Забароўскі сыходзіць з Міністэрства эканомікі?](/sites/default/files/styles/gallery_main/public/2023-08/minekonomiki.jpg.webp?itok=1F27mutX)
27 студзеня Аляксандр Лукашэнка прызначыў Дзмітрыя Крутога першым намеснікам міністра эканомікі. Але гэтая пасада не была вакантнай. Другім чалавекам у Мінэканомікі з 2014 года быў Аляксандр Забароўскі — малады ліберал з еўрапейскай адукацыяй.
Дзмітрый Круты нарадзіўся ў студзені 1981 года і ўсяго на паўтара гады старэйшы за Аляксандра Забароўскага. Але нават калі меркаваць па біяграфіях першых намеснікаў міністра эканомікі на сайце ведамства, розніца паміж імі вялікая. Забароўскі скончыў БНТУ, у 2007 годзе абараніў кандыдацкую дысертацыю, стажыраваўся ў Нямеччыне, Аўстрыі, Бельгіі і Кітаі. Круты — выпускнік БГТУ і Акадэміі кіравання, вучыўся ў аспірантуры, але дысертацыю не абараніў. Забароўскі да прызначэння першым намеснікам міністра эканомікі кіраваў апаратам Савета міністраў. Круты — кіраваў упраўленнем ляснога комплекса ў Міністэрстве эканомікі.
![Малады ліберал Забароўскі сыходзіць з Міністэрства эканомікі?](/sites/default/files/paragraphs/image/zabarouskikrutoy.png)
Сярод кадравых прызначэнняў, якія Аляксандр Лукашэнка ўзгадніў 27 студзеня, прозвішча Забароўскага не згадваецца. Яго наступнае месца працы пакуль невядомае. Па звестках TUT.by, малады ліберал пакідае Міністэрства эканомікі. Але ў самім ведамстве не выказваюцца так катэгарычна:
"Давайце дачакаемся афіцыйных момантаў. Так, Круты прызначаны першым намеснікам. Але давайце дачакаемся афіцыйных дакументаў і прызначэнняў", — адказаў Еўрарадыё на пытанне аб будучыні Аляксандра Забароўскага прэс-сакратар Міністэрства эканомікі Віктар Еўтухоў.
Паўгода таму ўладная вертыкаль ужо пазбавілася аднаго маладога ліберала. Доктар эканамічных навук Кірыл Руды памяняў крэсла памочніка Аляксандра Лукашэнкі на пасаду амбасадара Беларусі ў Кітаі. Што праўда, нават знаходзячыся за 6,5 тысяч км ад Мінска, Руды ўхітраецца прасоўваць свае думкі, публікуючы артыкулы ў тутэйшых навуковых часопісах.