Мінэнергетыкі прызнала, што другі энергаблок БелАЭС не працуе

Міністэрства энергетыкі Беларусі прызнала, што другі энергаблок БелАЭС не працуе. Яго "часова адключылі ад сеткі". Прычынай такога рашэння называецца "спрацоўванне аднаго з датчыкаў". Калі гэта адбылося, не паведамляецца. Адзначаецца, што на станцыі праводзіцца "штатная дыягностыка працы датчыкаў". І гэтыя дзеянні "не ўплываюць на бяспеку працы станцыі і яе абсталявання".

Якраз у чацвер стала вядома з неафіцыйных крыніц, што другі энергаблок адключаны з-за парушэння герметычнасці першага контуру. І адбылося гэта яшчэ ў ноч на 4 снежня. Атрымліваецца, што пра інцыдэнт на АЭС чыноўнікі маўчалі два тыдні. А загаварылі яны толькі пасля з'яўлення публікацыі ў СМІ. Але не рашыліся назваць дату, калі "спрацаваў датчык".

На сённяшні дзень не працуе і першы энергаблок — ён на "планавым рамонце". Другі энергаблок быў на рамонце летам-восенню, у сярэдзіне кастрычніка яго ўключылі ў сетку. Але нешта пайшло не так.