МЗС Эстоніі не будзе прызнаваць выбары ў Беларусі

Эстонія не будзе прызнаваць ні "выбары" ў Беларусі, прызначаныя на 26 студзеня 2025 года, ні іх вынікі. Гэта вынікае з камэнтара для ERR News генсакратара Міністэрства замежных спраў Эстоніі Ёнатана Усевіёва, адзначае "Позірк".

"Мы не лічым, што ў студзені ў Беларусі пройдуць выбары. Калі рэжым абвесціць, што выбары адбыліся, то мы, відавочна, дапаможам іншым убачыць, што гэта фарс", — заяўляе дыпламат.

Ён дадае, што беларускі народ, на жаль, жыве ва ўмовах дыктатуры.

Дарэчы, аналагічным чынам міністр замежных спраў Эстоніі Маргус Цахкна выказаўся яшчэ 19 лістапада: "Прэзідэнцкія выбары, якія маюць адбыцца ў студзені 2025 года, арганізаваныя ў атмасферы тэрору і не могуць адпавядаць дэмакратычным нормам".

Ён заклікаў заходнія краіны ўзмацніць санкцыі супраць рэжыму Лукашэнкі. На думку Цахкны, такім чынам Лукашэнку дадаць зразумець, "што прадаваць Расіі сваю краіну і народ недапушчальна".

Прэзідэнцкая кампанія праходзіць ва ўмовах жорсткіх палітычных рэпрэсій і пад поўным кантролем уладаў. Кандыдаты-спойлеры адкрыта абвяшчаюць, што іх галоўная задача — падтрымаць Лукашэнку. Асноўны дзень галасавання прызначаны на 26 студзеня 2025 года. Беларускія дэмакратычныя сілы назвалі гэтае мерапрыемства "бязвыбарамі".