На Аляксея Талая ва Украіне пачалі крымінальную справу за вываз дзяцей
Аляксей Талай / sportedu.by
Ва Украіне пачалі крымінальную справу на беларускага параалімпійца Аляксея Талая, перадае Радыё "Свабода". Расследуецца ягоная дзейнасць у незаконным перамяшчэнні ўкраінскіх дзяцей з часова акупаванай тэрыторыі Украіны.
У сакратарыяце ўпаўнаважанага Вярхоўнай Рады па правах чалавека кажуць, што крымінальная справа на Талая пачатая па дзвюх першых частках артыкулу 438 Крымінальнага кодэксу Украіны — парушэнне законаў і звычаяў вайны. Яму пагражае пазбаўленне волі на тэрмін ад 8 да 15 гадоў ці пажыццёвае зняволенне.
Таксама ў сакратарыяце ўкраінскага амбудсмена падкрэслілі, што прымусовы вываз дзяцей падпадае пад тры артыкулы Рымскага статуту Міжнароднага крымінальнага суда — генацыд у выглядзе дэпартацыі або гвалтоўнага перамяшчэння насельніцтва, злачынства супраць чалавечнасці і ваеннае злачынства.
Расследаваннем справвы займаецца Галоўнае следчае ўпраўленне Службы бяспекі Украіны. Дзейнасць Талая разглядаецца як адзін з эпізодаў у незаконным вывазе ўкраінскіх дзяцей з акупаваных тэрыторый у Расію і Беларусь.
Дарэчы, раней Украіна ўвяла санкцыі супраць Аляксея Талая і яго фонду.
Следчым перадалі таксама матэрыялы пра больш як 2000 ідэнтыфікаваных украінскіх дзяцей, якіх з верасня 2022-га да траўня 2023 года даставілі ў дзіцячы цэнтр "Дубрава" ў Мінскай вобласці.
Ці з'яўляецца Аляксандр Лукашэнка фігурантам гэтай крымінальнай справы, у сакратарыяце ўпаўнаважанага Вярхоўнай Рады па правах чалавека не адказалі. Але дадалі, што перамовы пра вяртанне дзяцей ва Украіну вядуцца толькі з Расіяй.
На гэты час ва Украіну змаглі вярнуць толькі 387 дзяцей. Агульная колькасьць незаконна вывезеных дзяцей, паводле ўкраінскіх падлікаў, перавысіла 19 тысяч.
