Навальнага 100 дзён прымушаюць слухаць адзін і той жа выступ Пуціна

Аляксея Навальнага 100 дзён прымушаюць слухаць адзін і той жа выступ Уладзіміра Пуціна. Гэта штогадовае пасланне расійскага прэзідэнта Федэральнаму сходу РФ ад 21 лютага 2023 года. Яго ўключаюць кожны вечар.

"Кажу нашаму зампаліту: ну вы нармальныя наогул? Стаўце рознага Пуціна, хіба мала прамоваў ён казаў? — піша Навальны. — Адказ патрос сваёй логікай: гэта штогадовае пасланне ад 23-га года. Значыць, яго трэба слухаць увесь 23-ы год. Выйдзе наступны зварот — будзем слухаць яго".

Аляксей Навальны паспрабаваў вырашыць праблему праз суд: "Пытаюся ў судзе: вы на якой падставе ставіце ў мой асабісты час Пуціна, а не радыё? Гэта незаконна".

У адказе на скаргу прадстаўнік калоніі спаслаўся на "інструкцыю па выхаваўчай працы":

— Гэта значыць словы Пуціна — выхаванне? — пытаецца Навальны.

— Не.

— Тады на якой падставе ўключаеце?

— Інструкцыя па выхаваўчай працы.

— Гэта значыць усё ж такі Пуцін — гэта выхаванне?

Суддзя ж у дзеяннях адміністрацыі калоніі парушэння закону не пабачыў.

Палітыку Навальнаму 47 гадоў. У студзені 2021-га ён вярнуўся з Германіі ў Расію пасля лячэння ад атручвання летам 2020 года ў РФ. Яго адразу ж затрымалі. Аляксей Навальны адбывае 9-гадовы тэрмін у калоніі строгага рэжыму ва Уладзіміраўскай вобласці.