Палітзняволенага Уладзіміра Гундара на год пазбавілі прадуктовай перадачы

Палітзняволенага Уладзіміра Гундара на год пазбавілі права атрымліваць прадуктовыя перадачы, паведамляе "Радыё Рацыя" са спасылкай на дасведчаную крыніцу. Раней яго ўжо каралі падобным чынам.

"З 1 сакавіка яго зноў пазбавілі перадачы. Хоць сядзіць ужо паўгода ў камеры-адзіночцы. Паводзіць сябе ніжэй за траву, цішэй за ваду. Таму сам не ведае, за што. Магчыма, у іх там па плане нешта такое бывае", — кажа крыніца выдання.

Нагадаем, актывіста і краязнаўцу з Баранавічаў Уладзіміра Гундара судзілі па справе "групоўкі Аўтуховіча". Ён адмовіўся даваць паказанні, расказаў толькі пра выкарыстанне гвалту, абвяшчаў галадоўку. У кастрычніку 2022 года Гродзенскі абласны суд прызначыў Гундару 18 гадоў калоніі ва ўмовах агульнага рэжыму. Затым яго судзілі яшчэ раз — за "абразу пракурора". Паводле вынікаў таго суда тэрмін яго зняволення павялічыўся да 20 гадоў. Гундар мае інваліднасць — у яго няма адной нагі.