Палітвязень Уладзімір Гундар у карцары аглух — праваабаронцы
Уладзімір Гундар / БЕЛТА
У апошні дзень свайго сямідзённага перабывання ў карцары палітвязень Уладзімір Гундар стаў кепска чуць, паведамляюць праваабаронцы.
Пасля выхаду з карцара Гундара стала ліхаманіць у камеры, яму было вельмі холадна, балелі галава і вушы. Мужчына перастаў чуць сукамернікаў і зразумеў, што аглух канчаткова.
Да яго выклікалі лекара, які даў палітвязню цытрамон і ібупрафен, абяцаў выклікаць лора. Аднак дагэтуль невядома, ці наведаў Гундара спецыяліст.
Карцарам палітвязня пакаралі яшчэ ў першы дзень красавіка за падушку, не так пакладзеную на шконку. Але на працягу месяца яго не адпраўлялі ў карцар, бо там не было вольнага месца.
Уладзімір Гундар асуджаны агулам на 20 гадоў калоніі ўзмоцненага рэжыму па чатырох артыкулах Крымінальнага кодэкса, у тым ліку па "справе Аўтуховіча". 6 чэрвеня адбудзецца разгляд апеляцыйнай скаргі па яго апошнім прысудзе.
