Беларусь рэзка павялічыла імпарт з акупаваных тэрыторый Украіны

За першыя дзевяць месяцаў 2024 года Беларусь істотна павялічыла аб’ёмы імпарту грузаў з акупаваных тэрыторый Украіны, паведамляе “Супольнасць беларускіх чыгуначнікаў”. Зафіксаваны велізарны рост паставак — больш за 25 тысяч тон, што ў 2,5 раза перавышае сумарныя аб’ёмы за папярэднія чатыры гады.

Як адзначаюць аўтары аналізу, у 2024 годзе прынцыпова змянілася і наменклатура імпартаванага грузу. Калі раней з акупаваных тэрыторый Украіны ў Беларусь вазілі вугаль, то ў 2024 годзе аснову складае металапракат і вырабы з металу.

Усяго за ўказаны перыяд было адпраўлена 382 вагоны агульнай вагой 25 425 тон.

Падрабязная наменклатура выглядае наступным чынам:

• Лістовая сталь — 13 179 тон;

• Гліна — 5 850 тон;

• Смолы каменнавугальныя — 3 540 тон;

• Лістовыя штрыпсы — 1 380 тон;

• Ліцейны кокс — 526 тон;

• Балкі і швелеры N10-12 — 276 тон;

• Дыябазавыя парашкі — 260 тон;

• Балкі і швелеры іншых тыпаў — 414 тон.

Сярод асноўных атрымальнікаў — найбуйнейшыя беларускія прамысловыя прадпрыемствы: ЗАТ «Асіповіцкі завод транспартнага машынабудавання», ААТ «Керамін», ІТААА «Омск Карбон Магілёў», ААТ «БЕЛАЗ», Мінскі аўтамабільны завод, ААТ «Гомельбудматэрыялы» і іншыя.

Беларусь літаральна скупляе тавар за бесцань. Сабекошт металургічнай прадукцыі на акупаваных тэрыторыях Украіны значна ніжэй за сярэднерынкавы.

Як адзначаюць чыгуначнікі, гэта абумоўлена таннай працоўнай сілай, адсутнасцю строгіх экалагічных і працоўных стандартаў, а таксама магчымасцю працаваць з мінімальнымі накладнымі расходамі.

Непрызнаны статус акупаваных рэгіёнаў дазваляе рэалізоўваць метал без аплаты стандартных падаткаў і экспартных пошлін.