Ніхто не застанецца адзін на Каляды і сківіца мастадонта — #ІхНоравы

19/12/2024 - 15:59

Замежныя навіны / @rubanau_collage

У Германіі актывісты дапамагаюць людзям змагацца з адзінотай на Каляды. Жыхарам сваёй краіны нарвежскія валанцёры дапамагаюць пераадольваць беднасць.

Тым часам зрабіць МРТ у Іспаніі цяпер можна будзе з дапамогай штучнага інтэлекту, а мужчына з Нью-Ёрка знайшоў у сябе ў двары сківіцу мастадонта.

Больш падрабязна пра тое, што робіцца ў свеце, чытайце ў нашай традыцыйнай рубрыцы “Іх норавы”.

Ніхто не застаецца адзін — план на Каляды ў Германіі

"Ніхто не застаецца адзін" — такую ініцыятыву прыдумалі ў Германіі, каб перазнаёміць людзей, якім няма з кім святкаваць Божае Нараджэнне. Арганізатары збіраюць іх кантакты, шукаюць тых, хто жыве побач, знаёмяць паміж сабой.

Летась у праекце ўзялі ўдзел больш за восем тысяч чалавек. У адным толькі ў Берліне працуе некалькі буйных ініцыятыў па гэтым кірунку. Удзельнікі праекта праводзяць сумесныя вячэры і канцэрты.

Ёсць прыклады і прыватных ініцыятыў. Напрыклад, уладальнік адной з аўтазаправак у Баварыі сёлета ладзіць бясплатную вячэру прыкладна на 25-30 чалавек, якім няма з кім разам сабрацца на Куццю. У меню — смажаніна, бульбяныя клёцкі і кіслая капуста.

Беднасць у Нарвегіі

Усё больш людзей у Нарвегіі сутыкаюцца з беднасцю. Паводле апытанняў, кожны пяты жыхар краіны з цяжкасцю зводзіць канцы з канцамі.

Напярэдадні Калядаў дабрачынная арганізацыя "Армія выратавання" рыхтуе для нарвежцаў прадуктовыя наборы. На гэтым тыдні іх атрымаюць 1400 сем'яў.

— Я ніколі не думала, што стану чалавекам, якому спатрэбіцца такая дапамога. Так што для мяне гэта быў доўгі шлях, каб увайсці ў гэтыя дзверы, — кажа біяінжынер Тоні Роўз. Калісьці яна сама была ў "Арміі выратаванні", але цяпер з-за хваробы мае патрэбу ў падтрымцы.

Большасць нарвежцаў, якія звяртаюцца ў "Армію выратавання", ужо атрымлівае сацыяльную дапамогу ад дзяржавы, але яе не стае на жыццё. Паводле дадзеных нарвежскага Чырвонага Крыжа, каля 100 тысяч дзяцей жывуць у сем'ях з пастаянным нізкім прыбыткам. Дабрачынная арганізацыя заклікае ўрад больш актыўна змагацца з беднасцю.

Никто не останется один под Рождество и челюсть мастодонта — #ИхНравы

Нарвегія / unsplash.com

Апарат МРТ з ШІ з'явіцца ў іспанскім шпіталі

Новы ўніверсітэцкі шпіталь Куэнкі ў Кастыліі стане першым у Іспаніі, дзе ўсталююць апарат з інтэграваным штучным інтэлектам.

Новаўвядзенне павінна палепшыць якасць выяваў, іх аналіз і інтэрпрэтацыю.

Шпіталь пастаянна папаўняецца інавацыйным абсталяваннем. У ім жа павінен з'явіцца найноўшы лінейны паскаральнік для лячэння анкалагічных хворых.

Сківіца мастадонта на заднім двары

На заднім двары аднаго з дамоў у Нью-Ёрку гаспадар знайшоў сківіцу мастадонта. Мужчына выпадкова заўважыў, што з газона тырчаць два зубы. Раскапаўшы некалькі сантыметраў пад імі, ён знайшоў яшчэ два — і выклікаў спецыялістаў.

Эксперты арганізавалі раскопкі і дасталі з зямлі добра захаваную сківіцу. Таксама яны знайшлі частку косткі пальца нагі і фрагмент рабра жывёлы.

Знойдзеныя часткі шкілета будуць дадаткова вывучаныя.

Мастадонты — гэта велізарныя жывёлы, якія з'явіліся ў Афрыцы 35 мільёнаў гадоў таму. Вонкава яны нагадваюць мамантаў і сланоў. Сысуны гэтага віду вымерлі каля 10 тысяч гадоў таму.