Ёлачны рай і самы ўплывовы чалавек Еўропы — #ІхНоравы

Газета Politico выбрала 28 уплывовых асобаў на еўрапейскім кантыненце, а сёлетнія нобелеўскія лаўрэаты міру атрымалі ўзнагароду і заклікалі звышдзяржавы вярнуцца да “ядзернага табу”.

У той час гарбаты кіт здзейсніў падарожжа, вартае “Адысеі”. Навошта? Пра гэта ды іншае чытайце ў нашай штодзённай рубрыцы “Іх норавы”.

Хто самы ўплывовы ў Еўропе?

Выданне Politico назвала самага ўплывовага чалавека Еўропы, і гэта прэм'ер-міністарка Італіі Джорджа Мелоні.

Адзначаецца, што лідарка правай партыі "Браты Італіі" за некалькі гадоў ператварылася з маргінальнай палітычнай фігуры ў аднаго з ключавых ігракоў на еўрапейскай і сусветнай палітычнай арэне.

“Сёння, калі вы хочаце гаварыць з Еўропай, то званок менавіта да Мэлоні — відавочны выбар. Нават такія фігуры, як Ілан Маск, найбагацейшы чалавек у свеце і дарадца новаабранага прэзідэнта ЗША Дональда Трампа, звяртаюцца да італьянскага прэм'ера для абмеркавання стратэгічных пытанняў”, — адзначае выданне.

Па словах аналітыкаў, яе ўплыў абумоўлены здольнасцю знаходзіць баланс паміж радыкальнымі ідэямі сваёй партыі і прагматычным супрацоўніцтвам з міжнароднымі партнёрамі.

Сярод іншых уплывовых людзей Еўропы апынуліся прэм’ер Польшчы Дональд Туск, папа Францішак, прадстаўніца ЕС па замежных справах і палітыцы бяспекі Кая Калас, кіраўнік Офіса прэзідэнта Украіны Андрый Ярмак ды нават прэзідэнт Расіі Уладзімір Пуцін. Увесь спіс можна паглядзець тут.

Лаўрэаты Нобелеўскай прэміі міру заклікалі да адмены ядзернай зброі

Трое з тых, хто выжыў пасля атамнай бамбардзіроўкі Японіі ЗША, атрымалі Нобелеўскую прэмію міру за 2024 год ад імя “Ніхон Хіданкё” — арганізацыі, якая выступае супраць ядзернай зброі.

Адзін з іх, 92-гадовы Тэрумі Танака, заклікаў да знішчэння усёй ядзернай зброі.

“Уявіце сабе: ёсць 4000 ядзерных боегаловак, якія можна запусціць неадкладна. Гэта азначае, што шкода, учыненая ў Хірасіме і Нагасакі, можа быць памножаная ў сотні ці нават тысячы разоў”, — прамовіў ён.

Ёлкі разам з тысячамі калядных фігурак запоўнілі амаль кожны пакой дому (нават прыбіральню), але не пакоі іх дачкі.

Джэраміны не ўпершыню становяцца сям'ёй з самым багата упрыгожаным да Калядаў домам. Рэкорд па колькасці елак яны ўтрымліваюць з 2017 года. Толькі ў 2022 годзе камусьці ўдалося іх абысці.

Кіт здзейсніў эпічную міграцыю, уразіўшы навукоўцаў

Навукоўцы заўважылі, што гарбаты кіт здзейсніў адну з самых працяглых і незвычайных міграцый, калі-небудзь зафіксаваных.

Яго бачылі ў Ціхім акіяне каля Калумбіі ў 2017 годзе, а праз некалькі гадоў высачылі каля Занзібара ў Індыйскім акіяне — на адлегласці не менш за 13 000 кіламетраў ад першага пункту.

На цяперашні момант гэта, хутчэй за ўсё, самая вялікая адлегласць, якую калі-небудзь зафіксавалі ў міграцыі гарбатага кіта.

Гэты від жыве ва ўсіх акіянах свету. Штогод кіты падарожнічаюць на вялікія адлегласці і маюць адну з самых працяглых міграцый з усіх млекакормячых, пераплываючы ад трапічных месцаў размнажэння да месцаў кармлення ў больш халодных водах.

Адна з тэорый зафіксаванай “адысеі” заключаецца ў тым, што змяненне клімату змяняе колькасць крэветкападобных крыляў, якімі харчуюцца гарбатыя кіты, прымушаючы іх падарожнічаць далей у пошуках ежы.

Іншае меркаванне — што кіты могуць даследаваць новыя месцы ў пошуку пары для размнажэння.