Пасол Сідарэнка пакончыў з сабой, не вытрымаўшы допытаў КДБ — "Наша Ніва"
Дзяніс Сідарэнка / прэс-служба МЗС
Экс-амбасадар Беларусі ў Германіі Дзяніс Сідарэнка пакончыў жыццё самагубствам, а не памёр ад сардэчнага прыступу, заяўляе "Наша Ніва". Паводле звестак выдання, дыпламат скокнуў са шматпавярховіка.
Трагедыя адбылася ў нядзелю, 23 чэрвеня. Інфармацыя пра яго смерць з'явілася спярша ў недзяржаўных СМІ, а толькі потым яе пацвердзілі ў МЗС.
Сідарэнка быў амбасадарам Беларусі ў Германіі з 2016 па 2024 года. Яго звольнілі з гэтай пасады ўказам Лукашэнкі сёлета 11 сакавіка.
"НН" піша, што пасля вяртання на радзіму дыпламат стаў аб'ектам увагі Камітэта дзяржаўнай бяспекі. Са словаў крыніцаў, ён "не вылазіў з паліграфаў і допытаў". Новую пасаду Сідарэнку не давалі.
У Сідарэнкі засталіся дзве дачкі.
