Павел Латушка стаў лаўрэатам адноўленай прэміі "Салідарнасць" імя Леха Валенсы

Павел Латушка стаў лаўрэатам адноўленай сёлета прэміі "Салідарнасць" імя Леха Валенсы. Пра гэта паведамляе афіцыйны сайт Міністэрства замежных спраў Польшчы.

Узнагароду ўручаць на ўрачыстай цырымоніі ў Варшаве 18 верасня ў Варшаве. Прысудзіць прэмію Латушку прапанаваў міністр замежных спраў Польшчы Радаслаў Сікорскі.

Прэмія "Салідарнасць" прысуджаецца польскім МЗС як прызнанне заслуг у прасоўванні і падтрымцы дэмакратычных каштоўнасцей. Сёлета рашэнне было прынята аднагалосна капітулай, у якой старшынствуе лаўрэат Нобелеўскай прэміі міру Лех Валенса і ў склад якой уваходзяць міністры замежных спраў, юстыцыі, культуры Польшчы, старшыня Польскага Хельсінкскага фонду правоў чалавека і старшыня фонду "Інстытут Леха Валенсы".

Каментуючы гэтае рашэнне, Павел Латушка назваў яго важным палітычным мэсэджам з боку Польшчы аб стратэгічнай падтрымцы дэмакратычных памкненняў беларусаў, адзначае прэс-служба Аб'яднанага пераходнага кабінета.

"Гэта вялікі гонар, але гэта і вялікая адказнасць. Важна, што яе з намі гатовы падзяляць нашы партнёры, нашы саюзнікі. Мы змагаемся з дыктатурай, мы змагаемся за Беларусь і мы не адны", — падкрэсліў Латушка.

У 2014 годзе лаўрэатам прэміі стаў Мустафа Джамілёў — лідар барацьбы за правы крымскіх татараў, якога неаднаразова вылучалі на Нобелеўскую прэмію міру. У 2015 годзе прэмію атрымала журналістка Жанна Нямцова — старэйшая дачка расійскага апазіцыянера Барыса Нямцова.