Прэм'ер Эстоніі загадала разабрацца з экспартам нафтапрадуктаў з Беларусі
Кампетэнтныя органы павінны разабрацца ў сітуацыі з тым, што Беларусь, якая трапіла пад санкцыі ЕС, выкарыстоўвае Эстонію для экспарту вялізных аб'ёмаў нафтапрадуктаў. Пра гэта заявіла прэм'ер-міністр краіны Кая Калас, піша postimees.ee.
Напярэдадні эстонскія СМІ апублікавалі расследаванне наконт паставак беларускіх нафтапрадуктаў. Выявілася, што ў 2021 годзе Эстонія імпартавала іх амаль утрая больш, чым у 2020-м. Пры гэтым у Эстонію была перанакіраваная траціна беларускай нафты, якая раней паступала ў порты Латвіі.
"Сітуацыя выглядае дрэнна, і я стаўлюся да яе вельмі сур'ёзна. Прынцыповая знешняя палітыка павінна выяўляцца і ў яе рэалізацыі ўнутры краіны: калі мы дамовіліся пра санкцыі, мы павінны іх выконваць, а калі ёсць прабелы, то іх трэба выпраўляць. У адваротным выпадку мы знізім уласны міжнародны аўтарытэт і права выказвацца", — заявіла Кая Калас.
Разбірацца ў сітуацыі яна даручыла Міністэрству замежных спраў і Міністэрству эканомікі і камунікацый, а таксама падаткова-мытнаму дэпартаменту.
Па словах прэм'ер-міністра, трэба высветліць, ці санкцыі зламысна абыходзяць або адбываецца злоўжыванне дзіркамі ў законе.
