Расіяніна, які дапамагае легіёну "Свабода Расіі", затрымалі ў Беларусі — СМІ

29-гадовага расіяніна Яўгена Убіраева ў Нацыянальным аэрапорце Мінск затрымалі супрацоўнікі ФСБ Расіі. Яго вінавацяць у дапамозе Украіне.

Яўген Убіраеў — 3D-мадэлер з расійскага горада Пыць-Ях. Калі пачалося шырокамаштабнае расійскае ўварванне ва Украіну, ён моцна перажываў за сяброў у гэтай краіне, адчуваў моцную дэпрэсію, меў суіцыдальныя думкі. Хлопец звярнуўся да легіёна "Свабода Расіі", які ваяваў на баку Украіны і на той момант яшчэ не быў прызнаны экстрэмісцкім у РФ, піша SOTAvision.

Убіраеў сфатаграфаваў і зняў на відэа некалькі вайсковых аб'ектаў і парковак. Потым меркаваны куратар, з якім звязаўся расіянін, прапанаваў яму падкласці пад чыйсьці аўтамабіль выбуховае прыстасаванне. Убіраеў адмовіўся, заявіўшы, што ён супраць забойства людзей. Тады меркаваны куратар стаў пагражаць, што здасць яго расійскім спецслужбам. Пасля гэтага хлопец з жонкай неадкладна пакінулі Расію.

У Арменіі Убіраеў беспаспяхова спрабаваў атрымаць замежны пашпарт, а праз 180 дзён быў вымушаны здзейсніць візаран — выехаць на дзень з краіны, каб "абнавіць" перабыванне там. Для гэтага ў снежні 2024-га ён адправіўся ў Беларусь. На зваротным шляху расіяніна ў мінскім аэрапорце затрымалі супрацоўнікі ФСБ.

Цяпер ён знаходзіцца ў СІЗА-1 Екацярынбурга. Па абвінавачанні ва ўдзеле ў тэрарыстычнай арганізацыі яму пагражае да 20 гадоў калоніі.

Бацька Яўгена раней ваяваў у Чачні, а цяпер ваюе супраць Украіны — ён завербаваўся з калоніі ў ПВК Вагнера. Паведамляецца, што Яўген тэлефанаваў бацьку з Арменіі і казаў, што яны з жонкай афармляюць замежныя пашпарты для падарожжа. Вагнеравец прыгразіў сыну, што верне яго ў Расіею "пад канвоем". Мама і айчым Яўгена ставяцца да хлопца добра, хаця таксама падтрымліваюць вайну.