Расійскі палітолаг: Са зменай пасла мэты Пуціна адносна Беларусі не змяніліся
![Расійскі палітолаг: Са зменай пасла мэты Пуціна адносна Беларусі не змяніліся](/sites/default/files/styles/gallery_main/public/2023-08/36910938_1850626834975409_2713074993423450112_n.jpg.webp?itok=Jts33LDl)
Прэзідэнт Расіі Уладзімір Пуцін прызначыў у нашу краіну новага пасла наўзамен Міхаіла Бабіча – Дзмітрыя Мезенцава. Чалавека, які з 2009 па 2012 год быў губернатарам Іркуцкай вобласці. Па словах расійскага палітолага з Іркуцка Сяргея Бяспалава, для Беларусі замена “жорсткага” Бабіча на больш “мяккага” Мезенцава прынцыпова нічога не змяняе.
“Мезенцаў схільны фантаніраваць ідэямі, ён вельмі актыўны чалавек, ён лічыцца добрым перамоўшчыкам і піяршчыкам. І я думаю, што ў Крамлі проста вырашылі змяніць стыль зносінаў з Беларуссю, але не змяніць мэту зносінаў з Беларуссю. А мэта ўжо ўсім добра патлумачаная: атрымаць нейкую юрыдычна значную дамову, на падставе якой можна змяніць Канстытуцыю Расіі і абнуліць тэрміны праўлення прэзідэнта Пуціна, зрабіўшы немагчымым транзіт улады некаму яшчэ. І хаця Мезенцаў будзе “мякка засцілаць, але спаць будзе не менш жорстка”. Мезенцаў – гэта чалавек, які блізкі да Пуціна і даўно яго ведае. І таму ў гэтым сэнсе для Беларусі нічога не змянілася: быў паслом “жорсткі” сябра Пуціна, а зараз паслом стаў іншы сябра Пуціна, які выглядае больш “мяккім”, – кажа палітолаг Сяргей Бяспалаў.
Што да губернатарства Дзмітрыя Мезенцава ў Іркуцкай вобласці, то Сяргей Бяспалаў прыгадвае гісторыю, калі супраць жадання губернатара даць падатковыя льготы адной нафтаздабываючай кампаніі выступіла нават... ФСБ. У прэсу нават трапіў дакумент за подпісам кіраўніка ФСБ па Іркуцкай вобласці, у якім такія дзеянні Мезенцава называліся “пагрозай нацыянальнай бяспекі Расіі”.