Шэф беларускай місіі на Паралімпіядзе: Мы абураныя ўчынкам Фомачкіна
![Шэф беларускай місіі на Паралімпіядзе: Мы абураныя ўчынкам Фомачкіна](/sites/default/files/styles/gallery_main/public/2023-08/shudeika.jpg.webp?itok=gomrMqhJ)
Шэф беларускай місіі на Паралімпіядзе ў Рыа Мікалай Шудзейка заявіў, што нашы спартсмены абураныя ўчынкам госця дэлегацыі Андрэя Фомачкіна, які пранёс расійскі сцяг на цырымоніі адкрыцця Гульняў.
У інтэрв’ю The Guardian Шудзейка заявіў, што каманда мае намер дыстанцыявацца ад Фомачкіна, дзеянні якога віталі як расійскія, так і беларускія ўлады. Таксама шэф беларускай дэлегацыі адзначыў, што пахвалы з боку расійскага ўраду вельмі засмучаюць нашых паралімпійцаў.
“Я не ўяўляў, што гэты чалавек збіраецца зрабіць такія дзеянні. Я быў узрушаны, убачыўшы ў яго руках расійскі сцяг падчас цырымоніі. Я папрасіў Фомачкіна прыбраць сцяг, ён зрабіў гэта толькі з другога разу”, — тлумачыць Шудзейка.
Па яго словах, Фомачкін быў акрэдытаваны ў якасці госця кіраўніка Нацыянальнага паралімпійскага камітэта Беларусі Алега Шэпеля. Ён не быў сябрам беларускай дэлегацыі і вырашыў паўдзельнічаць у цырымоніі адкрыцця ў самы апошні момант.
Таксама Шудзейка паведаміў, што прынёс прабачэнні за гэты інцыдэнт Міжнароднаму паралімпійскаму камітэту.
"Усе беларускія спартсмены і службовыя асобы шкадуюць пра гэты выпадак. Яны не хочуць быць ўцягнутыя ў парушэнне правілаў спаборніцтваў. Усе яны асудзілі дзеянні Фомачкіна. Гэта мая віна, што я не змог перадухіліць гэты інцыдэнт. Перад цырымоніяй я праінструктаваў ўсіх членаў дэлегацыі, распавёў, што палітычныя сімвалы і лозунгі забароненыя. Усе спартсмены строга выконвалі гэтыя правілы", — сказаў Мікалай Шудзейка.