У Аляксея Дзікавіцкага арыштавалі дом у Пінску
Арыштаваны дом Дзікавіцкага ў Пінску / facebook.com/aleksy.dzikawicki
У журналіста Аляксея Дзікавіцкага арыштавалі бацькоўскі дом у Пінску. Пра гэта ён сам расказаў у сацсетках.
Раней улады арыштавалі дом у вёсцы Мястковічы Пінскага раёна — яго пабудаваў дзед Аляксея.
"Хаты ў вёсцы, якую збудаваў мой дзед, у якой я гадаваўся да школы, ім мала. Даведаўся сёння, што арыштавалі яшчэ і дом у Пінску, які перадаў мне ў спадчыну бацька", — напісаў Дзікавіцкі ў Фэйсбуку.
Ён дадаў, што дагэтуль не ведае, у чым яго вінавацяць у Беларусі і за што арыштоўваюць яго маёмасць. "Добра, што да гэтага змрочнага часу не дажыў мой дзед Аляксей — вязень сталінскага лагеру, які хату ў вёсцы пабудаваў сваімі рукамі (і нават сталінская тройка ў яго яе не сканфіскавала), а тую, што ў горадзе — набыў для бацькі. Добра, што не бачаць гэтага і мама з бацькам", — дадаў журналіст.
Ён выказаў спадзяванне, што ў новай Беларусі незаконна забраную маёмасць вернуць гаспадарам, а вінаватыя адкажуць у адпаведнасці з законам.
Аляксей Дзікавіцкі даўно працуе ў польшчы. Ён шмат гадоў быў намеснікам дырэктара тэлеканала "Белсат", а потым — дырэктарам. Цяпер займаецца стрымінгавай платформай Belarus Tomorrow.
