У Асацыяцыі рэстаратараў раскол праз інаўгурацыю Лукашэнкі
Пасля таго, як Наталля Садоўская, кіраўніца Асацыяцыі рэстаратараў Беларусі, з'явілася на інаўгурацыі Аляксандра Лукашэнкі, яе арганізацыя пачала трышчэць па швах. Учынкам Садоўскай не задаволеныя прыхільнікі пераменаў і тыя, хто лічаць, што рэстаратары мусілі заставацца па-за палітыкай.
"Далейшае прыбыванне ў ARESTO.BY дыскрэдытуе мяне перад самім сабой", — лічыць саўладальнік мінскай рэстарацыі "Бессонница" Арцём Герасімаў. Ён падаў заяву аб выхадзе з Назіральнай рады АРБ.
Асацыяцыя выклала сваю пазіцыю адразу пасля таго, як стала вядома, што яе кіраўніца прысутнічала на інаўгурацыі. Яна палягае ў тым, што Садоўская прысутнічала ў Палацы Незалежнасці як прыватная асоба, а не як кіраўніца АРБ. Да таго ж, як стала вядома Еўрарадыё, дзяўчына, як і шмат хто з іншых гасцёў цырымоніі, не ведала, куды яе запрашаюць.
Рэстаратары Беларусі аб'ядналіся ў асацыяцыю ў красавіку, каб дапамагчы адно аднаму выжываць у час каранавіруса і абараняць свае правы. Першым кіраўніком асацыяцыі быў Вадзім Пракоп'еў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
