У бальніцы, у якую прывозілі палітвязня Віктара Бабарыку, затрымалі лекараў
Акцыя пратэсту медыкаў у Мінску ў 2020-м / t.me/belhalat_by/
У Наваполацку ў Цэнтральнай гарадской бальніцы 17 траўня адбылося масавае затрыманне лекараў, паведамляе @belhalat_by. Уролаг Павел Стальмакоў і хірург Міхаіл Пачкоўскі асуджаны на 15 сутак адміністрацыйнага арышту, загадчыца гінекалогіі Ірына Васільева і фельчар хуткай дапамогі Наталля Первянёнак — на 10 сутак. Лекара Алу Стальмакову аштрафавалі на 100 базавых велічынь (3700 рублёў).
Па інфармацыі праваабаронцаў, справы затрыманых разглядала суддзя Зінаіда Балаболава. Пачкоўскага, Стальмакова і Васільеву яна прызнала вінаватымі ў "распаўсюдзе экстрэмісцкіх матэрыялаў", Первянёнак і Стальмакову — у "несанкцыянаваным пікетаванні".
Затрыманні прайшлі ў бальніцы, у якую ў красавіку прывозілі палітвязня Віктара Бабарыку са слядамі пабояў. Інфармацыі пра тое, дзе ён знаходзіцца цяпер і ў якім стане, дагэтуль няма.
