У Беларусі ліквідуюць яшчэ адну літоўскую арганізацыю
На фестывалі нацыянальных культур у Гродне / grodnonews.by
У Беларусі ліквідуюць яшчэ адну літоўскую арганізацыю. З ініцыятывай выступіла Міністэрства юстыцыі, якое падало іск у Гродзенскі абласны суд.
Як піша Hrodna Life, збіраюцца ліквідаваць Міжнародную грамадскую арганізацыю "Клуб "Гервечай", якая існавала амаль тры дзесяцігоддзі. Пасяджэнне ў судзе запланавана на 23 лістапада.
Арганізацыя была зарэгістраваная ў 1994 годзе ў вёсцы Рымдзюны Астравецкага раёна Гродзенскай вобласці. У ёй налічвалася амаль 400 членаў. Раней "Клуб "Гервечай" арганізоўваў мерапрымствы сумесна з мясцовымі ўладамі і літоўскай амбасадай у РБ.
Вясной 2022-га ў Беларусі ліквідавалі аб'яднанне літоўцаў "Гімціне", якое працавала ў вёсцы Пеляса Воранаўскага раёна. Чыноўнікі знайшлі ў яго дзейнасці нейкія "парушэнні закона".
