У Гомелі шматдзетная сям'я паскардзілася на суседа, які "служыў у органах"
Каб разабрацца з былым сілавіком, Іван Крупко паабяцаў падключыць абласную міліцыю / t.me/gomel_region_gov/
У Гомелі шматдзетная сям'я паскардзілася на суседа-былога сілавіка. Маці траіх дзяцей датэлефанавалася на прамую лінію да старшыні аблвыканкама Івана Крупко. Жанчына распавяла, што жыве ў доме па вуліцы Кірава.
"Ужо некалькі месяцаў сусед знізу не дае спакойна жыць маладой сям'і: па начах у яго кватэры пастаянныя крыкі і музыка, — пераказвае яе словы прэс-служба Гомельскага аблвыканкама. — Пры гэтым ён спасылаецца на тое, што служыў у органах і лічыць, што мае права весці такі амаральны лад жыцця".
Шматдзетныя бацькі неаднаразова выклікалі міліцыю, звярталіся да ўчастковага, аднак выніку няма. Крупко паабяцаў разабрацца з былым сілавіком. Для гэтага ён збіраецца падключыць Упраўленне ўнутраных спраў Гомельскага аблвыканкама.
"Возьмем пад назіранне вашага суседа і вырашым гэтае пытанне. Такія паводзіны недапушчальныя нікому", — сказаў шматдзетнай маці кіраўнік вобласці.
