У Гордана Рамзі з "Пякельнай кухні" адабралі модны паб — #ІхНоравы

15/04/2024 - 16:38

#ІхНоравы / @rubanau_collage

Рана выдыхаць: прэм'ер-міністр Ізраіля Беньямін Нетаньяху яшчэ не сказаў, што не будзе адказваць Ірану на абстрэл, пра які вы ўсю нядзелю чыталі ў навінах. Так што свет застаецца ў стане гатоўнасці да эскалацыі на Блізкім Усходзе. Ну ці прасцей: мы ўсё яшчэ перажываем, як бы Трэцяя сусветная не прыйшла адкуль не чакалі.

Вайсковы кабінет Ізраіля 15 красавіка мусіць сабрацца, каб абмеркаваць, якім павінен быць адказ. А пакуль адцягнемся на іншыя навіны. Калі шчыра, таксама не самыя мірныя.

Небяспечныя гульні

Цырымонію адкрыцця Алімпійскіх гульняў у Парыжы могуць перанесці з набярэжнай Сены, сказаў прэзідэнт Францыі Эмануэль Макрон. У краіне перажываюць з нагоды магчымай тэрарыстычнай атакі.

Пакуль час і месца нязменныя: па плане 26 ліпеня больш за 300 тысяч чалавек будуць назіраць, як па парыжскай рацэ праплывуць лодкі з удзельнікамі гульняў.

"Тэрарысты хочуць перашкодзіць нам марыць, і гэта іх найвялікшая перамога. <...> Але ў залежнасці ад нашага аналізу кантэксту ў нас ёсць запасныя сцэнары", — сказаў Макрон.

І іх некалькі. Ёсць план B — цырымонію могуць правесці ў Тракадэра, раёне з відам на Эйфелеву вежу. І нават план C — "Стад дэ Франс".

Да Алімпіяды застаецца 100 дзён. Пра бяспеку Макрон разважаў у тэлеэфіры. Калі адна з тэлеглядачак падзялілася з ім сваёй трывогай праз тое, што яе сын будзе ўдзельнічаць у адкрыцці Алімпіяды, Макрон сказаў:

"Калі і ёсць месца, дзе ваш сын будзе ў бяспецы, то гэта менавіта там".

Прэзідэнт у судзе (іншы)

Дональда Трампа пачынаюць судзіць па падазрэнні ў крымінальным злачынстве. Справа, вядома, для ЗША беспрэцэдэнтная. Яшчэ ні разу ні былы, ні дзейны прэзідэнт перад судом не паўставаў.

Суд будзе доўжыцца як мінімум 6 тыдняў. І пры гэтым тыдзень, а то і дdf, зойме выбар прысяжных. Паспрабуй у такой справе знайсці 12 бесстаронніх чалавек!

Трампа абвінавачваюць у спробе схаваць выплату за маўчанне парназорцы Стормі Дэніэлс перад выбарамі 2016 года. Дэніэлс сцвярджае, што яны з Трампам былі блізкія ў 2006 годзе. І тагачасны адвакат Трампа Майкл Коэн заплаціў ёй 130 тысяч долараў за тое, каб яна пра гэта не ўспамінала.

Але судзяць Трампа не зусім за гэта: сама па сабе "таемная выплата" — нібыта не злачынства. Абвінавачваюць яго ў фальсіфікацыі дакументаў — у іх гэты грашовы перавод пазначылі як "кампенсацыю за судовыя выдаткі".

Усяго Трампу выставілі абвінавачанне ў махлярстве па 34 пунктах, але ён адмаўляе і гэтыя парушэнні, і сам раман з Дэніэлс. Журналістам экс-прэзідэнт сказаў, што тое, што адбываецца — "гэта атака на палітычнага апанента".

Будзе вельмі цікава, у асноўным таму, што Трампа будзе судзіць сапраўдны, а не беларускі суд. Нагадваем: сапраўдны суд — гэта калі абвінавачанню трэба даказаць, што хтосьці нехта не мае рацыі, а не проста паказаць у яго (яе) бок пальцам.

Забраць у багатых

Банда сквотараў асталявалася ў шыкоўным пабе шэф-кухара Гордана Рамзі коштам больш чым 15 мільёнаў еўра ў Лондане. І ўсё нават цікавей, чым здаецца на першы погляд.

Рамзі — гэта вядоўца суперпапулярнага кулінарнага шоу. А захопнікі — гэта шасцёра "прафесійных сквотараў". Яны хочуць выкарыстаць памяшканні дарагога паба, каб стварыць ўнутры грамадскую арт-кавярню.

Мэта — зрабіць будынак даступным для людзей, якія раней не маглі сабе дазволіць тут бываць. Сквотары ўжо пабудавалі барыкады з кухоннай тэхнікі Рамзі і заляпілі замкі.

"Паб быў часова зачынены, а будынак выстаўлены на продаж. І ў гэты час банда прафесійных сквотараў нейкім чынам абышла ўсю ахову і сістэму відэаназірання — і пранікла ўсярэдзіну. Яны заселі ў будынку і павольна захопліваюць яго, пакідаючы ўсюды сваё смецце і нахабна заяўляючы мясцовым жыхарам, што цяпер гэта іх дом", — апісвае захоп крыніца брытанскай The Sun.

У Гордона Рамзи из “Адской кухни” отобрали модный паб — #ИхНравы

Як выглядае захоплены будынак / PA Media

Шэф-кухар тэлефанаваў паліцэйскім, але тыя не дапамаглі выселіць сквотараў і сказалі, што гэта "грамадзянская справа". Таму не прыехалі. Затое панаехала журналістаў.

У Брытаніі забаронена скватаваць жылыя памяшканні. А вось заняць нежылое памяшканне... не тое каб можна, але злачынствам гэта не лічыцца. Больш за тое, калі сквотары бесперапынна цягам 10 гадоў будуць займаць гэтае памяшканне, яны змогуць падаць заяву на атрыманне статусу афіцыйных уладальнікаў.

Падобна, што Рамзі давядзецца вяртаць сваю ўласнасць праз суд. А пакуль ён будзе судзіцца, сквотары паспрабуюць адкрыць у модным месцы кавярню з бясплатнай ежай і напоямі і арганізаваць прастору для дэманстрацыі твораў мастацтва. Усё гэта — пратэст супраць расслаення грамадства на занадта багатых і занадта бедных.

Ой, карацей — #ІхНоравы.