У ГУР расказалі дэталі аперацыі па падрывах расійскіх аператараў FPV-дронаў

У ГУР Мінабароны Украіны расказалі некаторыя дэталі аперацыі па падрывах расійскіх аператараў FPV-дронаў. У спецыяльных FPV-акулярах былі схаваныя выбуховыя прыстасаванні. Яны выбухнулі ў лютым 2025-га.

Як піша hromadske.ua са спасылкай на крыніцу ў Сілах абароны Украіны, для правядзення аперацыі купілі вялікую партыю FPV-акуляраў. Далей ГУР праз расійскіх валанцёраў перадало іх у расійскія падраздзяленні БПЛА. У акулярах была схаваная выбухоўка, іх абсталявалі функцыяй дыстанцыйнага падрыву.

Суразмоўца выдання кажа, што "гэтая працяглая і складаная аперацыя працягваецца".

Паводле расійскіх крыніц, 4 лютага быў зафіксаваны першы выпадак падрыву самаробнай выбуховай прылады, схаванай у акулярах. Ён адбыўся на тэрыторыі Белгародскай вобласці. У расійскага вайскоўца траўмы твару і вачэй. 4-7 лютага было зафіксавана яшчэ 7 выпадкаў падрыву згаданых прылад на тэрыторыі Курскай, Луганскай і Данецкай абласцей.

У FPV-акулярах было выбуховае рэчыва С-4 (10-15 грамаў), дэтанатар і батарэя. Выбух адбываўся пасля запуску вентылятара астуджэння ў акулярах.