У МЗС Літвы прадстаўніку пасольства Беларусі ўручылі ноту пратэсту
Дачыненні паміж Літвой і Беларуссю толькі пагаршаюцца / delfi.lt
27 красавіка ў МЗС Літвы прадстаўніку пасольства Беларусі ўручылі "рашучую ноту пратэсту". Прычына — ліквідацыя ў РБ грамадскага аб'яднання літоўцаў Gimtinė ("Радзіма"), якое дзейнічала больш за 20 гадоў, паведамляе Delfi.
У пятніцу адбудзецца пасяджэнне Гродзенскага раённага суда па разглядзе справы аб ліквідацыі згаданай арганізацыі літоўцаў. У ноце адзначаецца, што такія дзеянні Беларусі выклічуць "жорсткі і прынцыповы адказ". Літва збіраецца ўзняць пытанне ў міжнародных арганізацыях.
Аб'яднанне Gimtinė працавала "над стварэннем умоваў для нацыянальнага самавыяўлення беларускіх літоўцаў". Ва ўмовах татальнай "зачысткі" грамадзянскай супольнасці ў РБ пацярпелі і афіцыйна зарэгістраваныя арганізацыі нацыянальных меншасцяў.
