У Расіі амаль у 20 разоў знізіліся продажы аўтобусаў МАЗ

У Расіі амаль у 20 разоў знізіліся продажы аўтобусаў МАЗ, піша "Позірк". У траўні 2024-га на расійскім рынку прадалі толькі 8 новых аўтобусаў Мінскага аўтамабільнага завода. У траўні 2023-га іх было 159.

За пяць месяцаў гэтага года рэалізавана 280 адзінак гэтай тэхнікі. У студзені-траўні 2023-га было 522. Падзенне склала 46,7%. За мінулы год беларускае прадпрыемства прадало ў РФ 925 аўтобусаў (на 11,1% менш, чым у 2022-м). Па выніках 2023-га МАЗ займаў 6-е месца ў адпаведным сегменце аўтарынку Расіі.

Нядаўна ў Санкт-Пецярбургу ўлады абмяркоўвалі сітуацыю з аўтобуснымі перавозкамі. Згадваліся і МАЗы, некаторыя з якіх "стаяць ля плота" ў чаканні гарантыйнага рамонту. Стала вядома, што ў горадзе МАЗ збіраецца будаваць сервісны цэнтр, афармляецца зямельны ўчастак на Пулкаўскай шашы.

Беларускія аўтобусы часта гараць у Санкт-Пецярбургу (летась налічылі амаль дзясятак такіх здарэнняў) і іншых гарадах. Мяркуецца, што ўзгаранні адбываюцца з-за замены на вытворчасці камплектуючых, пастаўкі якіх спыніліся праз санкцыі. На нядаўняй нарадзе адзначалася, што кітайскія камплектуючыя не такія надзейныя, як еўрапейскія.