Вандал, які пашкодзіў карціну “Іван Жахлівы”: ва ўсім вінаватая гарэлка
![Вандал, які пашкодзіў карціну “Іван Жахлівы”: ва ўсім вінаватая гарэлка](/sites/default/files/styles/gallery_main/public/2023-08/ivan_syn_2.jpg.webp?itok=2Zv4zOYc)
Мужчына, якога падазраюць у пашкоджанні карціны “Іван Жахлівы і сын яго Іван” у Траццякоўскай галерэі, прызнаўся, што здзейсніў гэты ўчынак у нецвярозым стане. Відэазапіс з фрагментам допыту падазраванага з’явіўся ў суполцы Mash ВКонтакте.
“Прыехаў паглядзець на яе. А восьмай вечара завітаў у буфет, выпіў сто грамаў гарэлкі і чагосьці… Гарэлку не п’ю, вось і накрыла”, — прызнаўся на запісе падазраваны.
Зламысніка клічуць Ігар Падпорын, яму 37 гадоў. Паводле звестак расійскіх СМІ, ён бяздомны, які ніколі раней не меў судзімасцяў і не стаяў на псіхіятрычным уліку.
Іцыдэнт у Траццякоўскай галерэі ў Маскве здарыўся ўвечары 25 траўня. Мужчына схапіў металічны слупок агароджы, разбіў ім шкло карціны і затым нанёс некалькі ўдараў па халсце.
Палатно парванае ў трох месцах. Найбольш каштоўнае — выява рук і твару цара і царэвіча не пацярпелі. Але падчас выпадзення шкла была пашкоджаная аўтарскай рама. Карціну знялі з экспазіцыі і накіравалі ў рэстаўрацыйную майстэрню. Паліцыя затрымала вандала. Распачатая крымінальная справа за пашкоджанне культурных каштоўнасцяў.
Як нагадвае meduza.io, гэта не першы напад на карціну Іллі Рэпіна “Іван Жахлівы і сын яго Іван”. У 1913 годзе палатно пашкодзіў нажом іконапісец-старавер Абрам Балашоў. Роўна праз 100 гадоў праваслаўныя актывісты патрабавалі ад кіраўніцтва Траццякоўкі прыбраць карціну з экспазіцыі, бо нібыта не існуе доказаў забойства Іванам Жахлівым уласнага сына.