Вуліца і завулак Кастуся Каліноўскага з'явіліся ў Чарнігаве

Ва ўкраінскім Чарнігаве з'явіліся вуліца і завулак, названыя ў гонар Кастуся Каліноўскага — кіраўніка паўстання 1863 года ў Беларусі. Адпаведнае рашэнне прыняла 8 лютага мясцовая гарадская рада.

Імя Каліноўскага атрымалі вуліца і завулак на поўначы горада. Раней яны называліся ў гонар героя Савецкага Саюза палкоўніка Сяргея Смірнова. 

Як распавядала Еўрарадыё, акурат у Чарнігаве сёлета адбывалася выстава, прысвечаныя загінулым беларускім добраахвотнікам, пад назвай "З Украінай у сэрцы". На яе адкрыцці прысутнічалі прадстаўнікі мясцовай вайсковай і грамадзянскай адміністрацыі.

Раней вуліцы Кастуся Каліноўскага з'явіліся ў іншых украінскіх гарадах — у Кіеве, Роўне, Жытоміры. Ёсць прапановы назваць імем беларускага героя адну з вуліц Львова.