Вышук і статус тэрарыстаў: справаздача ICAO дае новыя рычагі ціску на рэжым

Санкцыі супраць беларускай авіяцыйнай галіны не аслабнуць, а адказных за пасадку самалёта Ryanair у Мінску рэальна прызнаць міжнароднымі тэрарыстамі. Такія вынікі дае справаздача ICAO па пасадцы самалёта Ryanair у Мінску, лічыць юрыст НАУ Міхаіл Кірылюк.

Раней у эфіры Еўрарадыё Павел Латушка расказаў, што НАУ будзе працаваць далей над пытаннем пасадкі самалёта ў Мінску, каб прыцягнуць вінаватых да адказнасці. Даведаліся падрабязнасці, што рэальна зрабіць з вынікамі даклада і чаму паплечнікі Лукашэнкі сталі на крок бліжэй да статусу тэрарыстаў.

“Краіна фальсіфікуе дакументы, калі прыходзіць час справаздачы”

Вышук і статус тэрарыстаў: справаздача ICAO дае новыя рычагі ціску на рэжым

Праз ілжывыя паведамленні аб мініраванні маглі пацярпець пасажыры / Unsplash/Ф.Крыстопулас

Сутнасць справаздачы ICAO у тым, каб зрабіць экспертызу, а не кагосьці абвінаваціць, але там ёсць вельмі важныя рэчы, кажа Міхаіл Кірылюк.

— Па-першае, прама напісана, што беларускія ўлады давалі заведама лжывую інфармацыю аб пагрозе [выбуху. — Еўрарадыё]. Па-другое, мала таго, што ставілі пад рызыку жыццё людзей, яны яшчэ арганізавана падраблялі інфармацыю для ICAO.

Справаздача ICAO не толькі дае магчымасць даказаць, што беларускія ўлады наўмысна пасадзілі самалёт у Мінску, але і азначае, што санкцыі супраць беларускай авіяцыйнай галіны не здымуць.

Пасля інцыдэнту з Ryanair у інтэрнэце прыдумалі новы лагатып для “Белавія” / сацыяльныя сеткі

Судовыя справы былі, цяпер ёсць кандыдацтва ў тэрарысты

Судовыя справы супраць прадстаўнікоў беларускай авіяцыі ўжо вядуцца ў Польшчы, Літве і ЗША, падкрэслівае юрыст НАУ. У справаздачы ICAO згаданыя тры канвенцыі, якія парушаныя: Гаагская, Монрэальская і Чыкагская.

— У дзвюх з іх згаданая заведама лжывая інфармацыя, якая ставіць пад пагрозу жыццё пасажыраў. У адной пірацтва — гэта, дарэчы, сур’ёзнае абвінавачанне.

Трэба адзначыць, ЗША пайшлі далей за ўсіх у гэтым расследаванні. Таму што яны ўжо прад’явілі абвінавачанні, калі была толькі прамежная справаздача, а канчатковай не было. І яны ўжо прад’явілі абвінавачанне беларускім чыноўнікам: кіраўніку Белаэранавігацыі Леаніду Чуры, і яго намесніку Алегу Казючыцу.

Справаздача можа быць падставай для спраў у іншых краінах, чые грамадзяне былі на борце Ryanair. Менавіта праз гэта з’явілася справа ў ЗША. Але, хутчэй за ўсё, справаздача будзе яшчэ адным доказам у справах ЗША, Літвы і Польшчы, лічыць суразмоўца.

— Далей гэта можа быць падставай для таго, каб аб’явіць у міжнародны вышук асоб, у тым ліку па лініі інтэрпала, якія абвінавачваюцца ў парушэннях. Па запыце менавіта ЗША гэта можа адбыцца ўжо цяпер. Гэта першы вялікі напрамак, да якога НАУ плануе заклiкаць. Другі — уключыць вінаватых асоб у міжнародны спіс тэрарыстаў. Найлепшым будзе, калі хтосьці з вялікіх палітычных гульцоў, як ЗША ці ЕС, уключыць гэтых асоб у гэты спіс.

Дабіцца такіх вынікаў цалкам магчыма, лічыць прадстаўнік НАУ. Больш за тое, гэта будзе больш эфектыўна, чым чакаць, пакуль пройдуць следствы і суды.

— Год ці паўтара назад мы разважалі, што прызнаць Лукашэнку тэрарыстам вельмі складана. Цяпер кажуць нават пра тое, каб Пуціна тэрарыстам прызнаць. Таму лічу гэтую перспектыву цалкам магчымаю.

І гэта дакладна хутчэй, чым судовы працэс. Калі глядзець апошні падобны судовы працэс — гэта гісторыя з малазійскім боінгам, які быў збіты расійскімі ўладамі ў 2014 годзе. Судовы працэс дагэтуль ідзе. А ўключыць у спіс тэрарыстаў можна вельмі хутка. Калі ЗША трэба было гэта зрабіць, напрыклад, калі былі тэракты, гэта было зроблена без чакання прысудаў, бо гаворка ішла пра нацыянальную бяспеку. Лукашэнка і яго паплечнікі ўяўляюць небяспеку для ўсяго Еўрасаюза. Таму мы лічым гэты ход цалкам абгрунтаваным, — рэзюмуе эксперт.

Еўрарадыё пісала, што будзе, калі свет пачне лічыць рэжым Лукашэнкі спонсарам тэрарызму. На думку дырэктара Цэнтра даследаванняў постіндустрыяльнага грамадства Уладзіслава Іназемцава, менавіта гэта зробіць санкцыі эфектыўнымі.