“Лукашэнка не атрымаў нічога ўзамен”, — амерыканскі дыпламат

Грамадзянін ЗША, якога вызвалілі ў Беларусі, — гэта не адвакат Юрась Зянковіч. Пра гэта паведаміў галоўны дарадца Ціханоўскай Франак Вячорка.

12 лютага былі вызваленыя два палітвязні: супрацоўнік беларускай службы Радыё Свабода Андрэй Кузнечык і шматдзетная маці Алена Маўшук.

Таксама паведамлялася пра вызваленага "грамадзяніна ЗША, імя якога пакуль не раскрываецца". У інтэрнэце з'явіліся здагадкі, што гэтым чалавекам мог быць адвакат Юрась Зянковіч, які мае грамадзянствы Беларусі і ЗША.

У каментары "Белсату" Вячорка патлумачыў, што вызвалены амерыканец сам пажадаў захаваць сваё імя ў таямніцы. "Я думаю, што амерыканская адміністрацыя вызначыць, называць яго імя, ці не. Мы называем толькі беларусаў, за вызваленне якіх у тым ліку змагаліся. Яны сталіся часткаю гэтага вызвалення дзякуючы намаганням амерыканскай адміністрацыі", — дадаў ён.

Падрабязнасці для CNN раскрыў Крыс Сміт, намеснік памочніка дзяржсакратара ЗША па Еўропе: “Гэта была спецыяльная аперацыя: мы перасеклі беларускую мяжу, сустрэліся ў Мінску з прадстаўнікамі ўладаў, якія перадалі нам трох затрыманых. Мы забралі іх і вывезлі праз Літву”. Паводле Сміта, гэта быў “аднабаковы жэст” з боку беларускіх уладаў, якія імкнуцца палепшыць адносіны з ЗША.

“Лукашэнка не атрымаў нічога ўзамен”, — адзначыў ён.

Дзяржсакратар Марк Рубіа ў сваёй заяве з гэтай нагоды падкрэсліў, што ЗША працягнуць змагацца за вызваленне сваіх суграмадзян у Беларусі ды іншых краінах.