Як перажыць зіму і не з'ехаць з глузду? 12 спосабаў, якія вам дапамогуць

05/12/2023 - 17:05

Зіма — пара прачынацца / LanaSham

Абстаноўка ў свеце вымушае жадаць лепшага, а надыход халадоў зводзіць на нішто і без таго паганы настрой. Хочацца заснуць і прачнуцца ў іншай рэальнасці — пажадана ў цёплы і сонечны дзень, пад блакітным і мірным небам.

Ёсць добрая навіна: калі вы не любіце зіму — вы як мінімум не адны такія.

Разам з псіхолагам Наталляй Скібскай Еўрарадыё разбіраецца, чаму з надыходам халадоў людзі адчуваюць сябе так дрэнна і як можна змяніць сваё жыццё, каб палегчыць гэты перыяд.

Чаму зіма прыбівае?

Сонейка няма. Калі казаць пра Беларусь, Літву і Польшчу, сонца тут катастрафічна мала. Атрымліваецца, няма святла і не хапае цяпла. Ад таго, што халодна, мы выдаткоўваем вельмі шмат энэргіі. Трэба назапашваць яе, каб настроіцца на выхад з дому і зрабіць крок.

Трэба пратрымацца да 22 снежня. Потым будзе лягчэй, бо светлавы дзень пачне павялічвацца, таму не ўсё так страшна.

Дадайце святла

Не эканомце на электрычнасці. Уключайце лямпы дзённага святла днём, вечарам, перад сном, — лямпы чырвонага і жоўтага святла, якое нагадвае захад сонца. Гэта вельмі важна. Без святла ў нас не выпрацоўваецца вітамін D, які нам вельмі патрэбны.

Будзьце ў цяпле

Не варта эканоміць на абаграванні жылога памяшкання. Калі выходзіце на вуліцу, трэба дбаць пра тое, каб вам было цёпла. Насіце цёплыя боцікі і рукавіцы.

Прымайце вітаміны і мінералы

Вітамін D трэба прымаць абавязкова, пры гэтым неабавязкова здаваць аналізы крыві [гэта меркаванне псіхолага, лепш парайцеся з лекарам. — Еўрарадыё]. Узімку яго не хапае апрыёры. Сваімі уласцівасцямі ён вельмі нагадвае гармон і ўдзельнічае ўва многіх працэсах эндакрыннай сістэмы.

Таксама важна ўмацоўваць арганізм MgB6. Неабходна прымаць цынк і селен для адпаведнай працы гарманальнай сістэмы. Увогуле, купіце сабе комплекс вітамінаў і мінералаў.

Можна стварыць дома святочную атмасферу, але…

Мяккія, прыемныя навобмацак пледы далікатных колераў, агеньчыкі, ялінка, пах спецый... На жаль, не ўсім гэта будзе пасаваць. У некага калядная атмасфера можа асацыявацца з чымсьці сумным.

Как пережить зиму и не сойти с ума? 12 способов, которые вам помогут

Калядны Мінск / realt.by

Напрыклад, страшна раздражняе навагодняя ілюмінацыя, таму што хочацца адзначыць свята дома з роднымі, а вярнуцца ў Беларусь нельга. Усё што заўгодна можна праасацыяваць з нейкімі падзеямі. Тым не менш старайцеся выходзіць з гэтага і не псаваць сабе ўсе святы.

Так, гэта раз'юшвае, але жыць трэба. Узгадайце пах калядных пірагоў або пернікаў. Гэта правільныя пахі, якія бадзёраць нас менавіта зімой.

Памяняйце абстаноўку ў кватэры

Можна не ўпрыгожваць ялінку, але стварыць атмасферу, у якой будзе добра менавіта вам. Хочацца лета? Калі ласка. Пафарбуйце сцены ў яркі колер, купіце аромалямпы і цытрусавы алей, павесьце вялікую выяву мора.

Парастаўляйце на паліцах сувеніры, якія прывезлі з адпачынку і якія будуць натхняць вас, нагадваючы, што зіма пройдзе. Купіце пальму ці якую-небудзь іншую кветку. Усім прыемна глядзець на расліны.

Насіце яркае

Калі пейзажы за акном навяваюць сум, самая пара змяніць гардэроб. Купіце што-небудзь яркае і падніміце настрой не толькі сабе, але і навакольным. Узгадайце людзей у цёмнай вопратцы, якія едуць у зімовым мінскім метро, і кагосьці аднаго ў ярка-жоўтым пухавіку — вачэй не адарваць.

Дыхайце свежым паветрам і высыпайцеся

Дыхаць трэба. Гуляць трэба. Хаця б мінімальная фізічная актыўнасць павінна быць. З іншага боку, у тым, каб ляжаць пад коўдрай, няма нічога дрэннага, калі вы адпачываеце акурат з разуменнем таго, што вам гэтага хочацца і так трэба.

Але калі вы ляжыце і разумееце, што выпіхваеце сябе з гэтай канапы, то сэнсу ў ляжанні няма. Калі вы ляжыце паталагічна доўга і не можаце сабрацца, ёсць верагоднасць, што ў вас сезонна-афектыўны разлад.

Тады трэба падняць сябе і адвесці да псіхіятра па дапамогу. Сапраўды, ёсць людзі, якіх зіма прыбівае так моцна, што яны на гэты перыяд упадаюць у дэпрэсію. Не мучайце сябе.

Захоўвайце інфармацыйную гігіену і станавіцеся на лыжы

Лыжы — гэта, вядома, для аматараў. Можна проста заняцца справай, якое прыносіць задавальненне. Падабаецца танцаваць — танцуйце, любіце маляваць — калі ласка.

Захоўвайце інфармацыйную гігіену. Калі вам вельмі важна заставацца ў курсе, хаця б чытайце навіны не ў той час, калі вы толькі прачнуліся і задаеце сабе настрой на цэлы дзень, альбо не на ноч: калі вы начытаецеся нейкіх жахаў, вы проста зруйнуеце сабе сон. Выбірайце час, калі ў вас хапае рэсурсу, каб засвоіць нейкую інфармацыю і своечасова сказаць сабе "стоп". Бясконца сядзець у навінах не трэба.

Ёсць сілы — займіцеся дабрачыннасцю

Не хапае сонца? З'ездзіце да сонечных дзетак, вось там — святло. Паклапаціцеся пра старых, успомніце, хто яшчэ можа мець патрэбу ў вашай падтрымцы. Можна дапамагаць жывёлам — браць на ператрымку сабак і катоў. Калі робім нешта добрае для іншых, мы падмацоўваем энергіяй саміх сябе.

Дарэчы, хатняя жывёла — гэта крута

Калі ёсць магчымасць узяць звярка не толькі на ператрымку, зрабіце гэта. Хтосьці любіць коцікаў — яны вельмі файна вурчаць, хтосьці любіць сабак, якія заўсёды радуюцца, калі вы прыходзіце дадому з працы. У дадатак з імі трэба гуляць, а значыць, у вас заўсёды будзе нагода выйсці на вуліцу і падыхаць.

Памятайце, што радавацца жыццю — нармальна

Ёсць людзі, якія кажуць, маўляў, вакол вайна — значыць не час хадзіць па кавярнях, улюбляцца і гэтак далей. Жыць. Жыццё — яно тут і цяпер, вось такое, якое нам дасталася.

Сённяшні дзень не паўторыцца, заўтра будзе заўтра. Калі ў вас ёсць сілы любіць — любіце. Чытайце, глядзіце натхняльнае кіно, хадзіце ў тэатры і на выставы, вучыцеся і развівайце сябе як асобу. Чым больш у нас будзе шчаслівых і рэалізаваных людзей, тым больш здаровым будзе грамадства.

Будзьце разам

Трэба шукаць сваю банду, з якой можна займацца чымсьці разам. Любіце лазню? Ідзіце ў лазню. Спявайце песні — гэта проста выдатна. Больш размаўляйце адно з адным і не замыкайцеся ў сабе.

Цяжка? Ідзіце да псіхолага.