ЗША могуць адправіць ва Украіну вайскоўцаў у выпадку правалу перамоваў з РФ

ЗША могуць адправіць ва Украіну вайскоўцаў у выпадку правалу перамоваў з Расіяй па спыненні вайны. Тады супраць РФ будуць уведзены санкцыі. Пра гэта ў інтэрв'ю The Wall Street Journal заявіў віцэ-прэзідэнт ЗША Джэй Дзі Вэнс. Ён падкрэсліў, што варыянт адпраўкі войскаў ЗША ва Украіну застаецца "на парадку дня".

"Ёсць эканамічныя рычагі ціску, ёсць, вядома, і ваенныя рычагі ціску", — сказаў Вэнс. Цяпер мэта ЗША — пераканаць Уладзіміра Пуціна, што дыпламатыяй ён даможацца большага, чым на полі бою.

Віцэ-прэзідэнт ЗША не выключае, што вынік перамоваў з Расіяй для многіх можа стаць шокам. Пры гэтым адзначыў, што Злучаныя Штаты "хвалюе суверэнная незалежнасць Украіны".

Джэй Дзі Вэнс кажа, што ў выпадку заключэння паспяховага мірнага пагаднення і спынення вайны ва Украіне можа адбыцца перазагрузка дачыненняў ЗША і РФ. Мэта відавочная — не дапускаць далейшага збліжэння Масквы і Пекіна.

Выданне адзначае, што Джэй Дзі Вэнс прадставіў больш жорсткую пазіцыю ЗША ў дачыненні да Расіі, чым кіраўнік Пентагона Піт Хэгсет. Апошні гаварыў, што "гарантыі бяспекі для Украіны павінны быць забяспечаныя сіламі краін Еўропы", а ЗША не накіруюць туды свае войскі.

У сераду прэзідэнт ЗША Дональд Трамп распавёў пра тэлефонную размову з Пуціным. Яны пагадзіліся з неабходнасцю спыніць вайну ва Украіне, былі анансаваныя перамовы. Па некаторых звестках, будуць рабіцца спробы дамагчыся спынення агню ва Украіне ў красавіку-траўні 2025-га.