Зяленскі абверг словы Трампа пра 4% рэйтынгу

Уладзімір Зяленскі абверг словы прэзідэнта ЗША Дональда Трампа пра 4% рэйтынгу, якія нібыта мае ўкраінскі прэзідэнт. Зяленскі спаслаўся на вынікі апытання Кіеўскага міжнароднага інстытута сацыялогіі, праведзенага ў лютым 2025-га. 57% яго ўдзельнікаў давяраюць прэзідэнту Украіны (у снежні 2024-га былі 52%), не давяраюць 37% (у канцы мінулага года — 39%).

"Так што калі хтосьці хоча мяне памяняць прама цяпер — не атрымаецца, — цытуе словы Уладзіміра Зяленскага на прэс-канферэнцыі hromadske.ua. — Калі ўжо гаворым пра 4%, мы бачылі гэтую дэзінфармацыю, мы разумеем, што яна ідзе ад Расіі. У нас ёсць доказы, што гэтыя лічбы абмяркоўваюцца паміж Амерыкай і Расіяй. На жаль, Трамп жыве ў гэтай дэзінфармацыйнай прасторы".

Дональд Трамп, спасылаючыся на нібыта нізкі рэйтынг украінскага прэзідэнта, заяляў пра неабходнасць выбараў ва Украіне. 

Уладзімір Зяленскі не згодны і з ацэнкай Трампа амерыканскай дапамогі, якую атрымала Украіна. Амерыканскі прэзідэнт згадаў суму каля $350 млрд. Па словах Зяленскага, Украіне "вайна каштавала 320 мільярдаў долараў". З гэтай сумы $120 млрд — украінскія сродкі, 200 мільярдаў долараў — сродкі ЗША і ЕС. Ён адзначыў, што асобна Злучаныя Штаты далі зброі на $67 млрд і "$33,5 млрд прамой фінансавай дапамогі ў бюджэт".