Blur прэзентавалі новы відэасінгл — "Замнога нас" (слухаць)

Blur прадставілі другі сінгл пад назвай "There Are Too Many Of Us" ("Замнога нас"), які папярэднічае выхаду будучага паўнафарматніка. Раней музыкі ўжо прадставілі песню "Go Out" з яго. Плануецца, што альбом пад назвай "The Magic Whip" убачыць свет 27 красавіка. У яго ўвойдуць 12 кампазіцый, большая частка з якіх была запісаная падчас пяцідзённай студыйнай сесіі ў Ганконгу вясной 2013-га года.

Дэйман Элбарн ахарактарызаваў саўнд пласцінкі як "урбаністычны" і нават правёў паралелі з "берлінскім" перыядам Боўі. А басіст каманды Алекс Джэймс называе працу адным з лепшых запісаў за ўсю кар'еру Blur. "The Magic Whip" стане першай працай Blur за 16 гадоў, запісанай у арыгінальным складзе з гітарыстам Грэмам Коксанам, які сышоў з гурта перад запісам альбома "Think Tank" у 2003 годзе.

Што тычыцца канцэртнай падтрымкі рэліза, то пакуль вядома, што гурт збіраецца адыграць вялікі канцэрт у лонданскім Гайд-парку чэрвені гэтага года ў межах фестывалю British Summer Time, а пасля праехацца з шэрагам шоў па Брытаніі.

Фота: stereoboard.com.