Міліцыя адпрацоўвала дзеянні пры з'яўленні беспілотнікаў на футбольным матчы
Беспілотнік на гомельскім стадыёне "Цэнтральны" / gp.by
У Гомелі на стадыёне "Цэнтральны" прайшлі тактычна-спецыяльныя вучэнні. Міліцыя і ўнутраныя войскі адпрацоўвалі дзеянні "па спыненні магчымых масавых беспарадкаў падчас футбольнага матчу і пасля яго". Агулам там сабралі 120 чалавек, у тым ліку амапаўцаў і роту канвойнай службы, піша "Гомельская праўда".
Паводле легенды вучэнняў, на футбольны матч у Гомелі збіраецца прыбыць шматлікая група заўзятараў, а сярод іх і "агрэсіўных". Задачай сілавікоў называецца не дапушчэнне ўзнікнення на стадыёне канфліктных сітуацый, запальвання фаераў, прарыву на футбольнае поле. Таксама адпрацоўваліся дзеянні ў выпадку выяўлення прадмета, падобнага на выбуховае прыстасаванне, і супрацьдзеянне беспілотнікам.
