Суд па справе забойства Паўла Шарамета прыпынілі — фігуранты на фронце

Суд па справе забойства журналіста "Украінскай праўды" Паўла Шарамета прыпынілі, паколькі некаторыя фігуранты знаходзяцца на фронце, паведамляе pravda.com.ua. Беларускі журналіст загінуў 20 ліпеня 2016 года. Яго аўтамабіль быў падарваны ў цэнтры Кіева.

Спыніць разгляд справы папрасіла абарона абвінавачаных. Высветлілася, што медык Яна Дугар была мабілізавана ва Узброеныя сілы Украіны, займае кіруючую пасаду, эвакуюе байцоў з поля бою. Андрэй Антоненка служыць у войску па кантракце, ваюе на адным з важных напрамках фронту. Трэцяя фігурантка справы Юлія Кузьменка, як лекар, ездзіць у прыфрантавыя раёны.

Выданне адзначае, што пацярпелыя падтрымалі прыпыненне разгляду справы — адвакат таксама на фронце.

Падазраваныя былі затрыманыя толькі ў снежні 2019-га года. Імі сталі былыя ўдзельнікі аперацыі ў Данбасе Андрэй Антоненка, Юлія Кузьменка і Яна Дугар. Па версіі следства, Дугар дапамагала рыхтаваць злачынства, а Антоненка і Кузьменка непасрэдна закладвалі выбухоўку і ажыццявілі выбух. Усе трое — толькі выканаўцы.

Першапачаткова Антоненка і Кузьменка арыштавалі, а Дугар адправілі пад кругласутачны хатні арышт. Але пазней меру стрымання ўсім тром змякчылі. Яны сваёй віны не прызнаюць.

Павел Шарамет — вядомы беларускі журналіст, які вымушаны быў з'ехаць у Расію, а пасля пераехаў ва Украіну. Ён вядомы сваімі расследаваннямі знікненняў у Беларусі апазіцыйных палітыкаў, аператара Змітра Завадскага.