Анархіст Зміцер Паліенка выйшаў на волю пасля 15 сутак зняволення

Паліенка быў затрыманы ў будынку суда Першамайскага раёна Мінска 8 ліпеня.

"Я хачу расказаць, што адбываецца ў ЦІП. Зараз там вельмі жорстка, я ўпершыню з такім сустрэўся. Палітычныя зняволеныя ўтрымліваюцца ў адзіночным зняволенні без усялякай прычыны, матрацы не выдаюцца, усё робіцца для таго, каб сварыць звычайных зняволеных з палітычнымі, у адзіночным зняволенні няма вады, трэба кожны раз пытаць", — распавёў" Свабодзе" Зміцер Паліенка.

Па словах Паліенку, на яго было складзена яшчэ як мінімум два пратаколы. Актывіст таксама быў дапытаны супрацоўнікамі міліцыі з Маскоўскага РАУС у рамках крымінальнай справы за абразу міліцыянтаў у Ганцавічах. Яму не паведамілі у якім статусе ён знаходзіцца ў дадзенай крымінальнай справе.

Зміцер Паліенка дагэтуль адбывае пакаранне па крымінальнай справе. У 2019 годзе суд прызнаў яго вінаватым у "асабліва злосным хуліганстве" (частка 3 артыкула 339 Крымінальнага кодэкса) і прыгаварыў яго да 3 гадоў пазбаўлення волі без накіравання ў папраўчую ўстанову.