Беларускі фрыстайліст Дзмітрый Дашчынскі завяршае кар'еру спартсмена

Вядомы беларускі фрыстайліст, прызёр двух Алімпіяд Дзмітрый Дашчынскі вырашыў завяршыць кар'еру спартсмена. Пра гэта ён заявіў у інтэрв'ю газеце "АиФ в Беларуси".

"Яшчэ былі сумневы з нагоды выступу ў будучым сезоне, але ўсё вырашыў выпадак, — распавядае Дашчынскі. — Спускаўся па лесвіцы — спатыкнуўся, упаў і зламаў палец. Нібыта, глупства, але месяц правёў у гіпсе, і — бывайце летнія зборы. Затым нагадала пра сябе старая траўма пляча. Так што на бліжэйшым чэмпіянаце свету, які пройдзе ў студзені, я ўжо не выступлю".

Дзмітрыю Дашчынскаму 37 гадоў. На яго рахунку "бронза" Алімпійскіх гульняў 1998 года ў Нагана і "срэбра" Алімпіяды 2006-га ў Турыне.

Нядаўна пра завяршэнне сваіх спартыўных кар'ер аб'явілі таксама алімпійская чэмпіёнка Сочы-2014 у лыжнай акрабатыцы Ала Цупер і алімпійскі чэмпіён Ванкувера-2010 Аляксей Грышын.

Фота — by.tribuna.com