Беларусы сталі піць больш слабаалкагольных напояў. Гэта праблема?

07/10/2024 - 15:04

Ужыванне слабаалкагольных напояў вырасла ўтрая

Ужыванне слабаалкагольных напояў вырасла ўтрая

За апошнія пяць гадоў спажыванне слабаалкагольных напояў сярод беларусаў патроілася. У 2019 годзе на душу насельніцтва прыпадала 1,5 літра, а да 2023 года гэты паказчык вырас да 4,5 літраў.

Хоць гэта значна менш, чым спажыванне моцных алкагольных напояў, і ў дзесяць разоў менш, чым піва, гэткі рэзкі рост нельга не заўважыць.

Еўрарадыё высветліла ў доктара-нарколага і прадпрымальніка, з чым можа быць звязаная такая змена.

"Несур'ёзнае адхіленне"

Нарколаг Уладзімір Пікірэня кажа, што трохразовы рост спажывання слабаалкагольных напояў не з'яўляецца вялікай праблемай для Беларусі, паколькі ў абсалютных лічбах гэта не вельмі вялікі паказчык. На яго думку, значна важней, што ўжыванне моцнага алкаголю павялічылася.

— Напрыклад, у 2019-м у пераліку на чысты спірт ужывалі 4,92 літра моцнага алкаголю, а ў 2023-м выпівалі ўжо 5,32 літра. Гэта павышэнне большае, чым на 1%. І ў гэты ж час аналагічнае падзенне ўжывання віна. Гэта значыць, народ пачаў пераходзіць на моцнае — і гэта вельмі негатыўная тэндэнцыя, на якую я б звярнуў увагу.

Слабаалкагольныя напоі — гэта збольшага джын-тонікі і сідры, якія, на думку доктара, сталі папулярнымі толькі апошнія некалькі гадоў. Верагодней за ўсё, іх купляюць тыя ж людзі, што купляюць і піва, але часам выбіраюць нешта яшчэ больш лёгкае па ўтрыманні алкаголю.

— Гэта асаблівасць маленькіх лічбаў, трохі падрасло — і адразу ў тры разы. А ў абсалютных лічбах — гэта несур'ёзнае адхіленне. І наогул, гэта больш пазітыўная тэндэнцыя, таму што слабаалкагольныя напоі не такія шкодныя, як моцныя. Даўно вядома, што чым мацнейшы напой, тым ён больш шкодны. Таму тое, што слабы алкаголь больш шкодны, чым моцны — гэта міф. Нават калі паглядзець статыстыку па атручаннях, то абсалютная большасць будзе звязаная з моцнымі напоямі.

У цэлым, Пікірэня адзначае, што чым часцей чалавек ужывае алкаголь, тым вышэй рызыка развіцця розных захворванняў. Гэта тычыцца не толькі залежнасці, але і мноства сацыяльных праблем, якія таксама могуць з'явіцца.

— Большасць забойстваў або розных сямейных канфліктаў адбываюцца ў стане алкагольнага ап'янення, плюс вельмі вялікая колькасць ДТЗ. Так, празмернае ўжыванне можа прыводзіць да цукровага дыябету, падвышанага ціску, інсульту і анкалогіі.

"Хутчэй за ўсё, спажываюцца моладдзю"

Палітык, блогер і прадпрымальнік Аляксандр Кныровіч мяркуе, што рост спажывання слабаалкагольных напояў наўпрост звязаны з агульным павелічэннем спажывання алкаголю ў краіне.

— Вядома, хутчэй за ўсё слабыя напоі спажываюцца моладдзю, якая, выходзячы ў дарослы свет, аддае перавагу менавіта ім, а не гарэлцы ці нечаму мацнейшаму. Сказаць, што ў цэлым моладзь стала больш піць, я не магу — для гэтага ўсё ж такі трэба мець больш падрабязную статыстыку, каб гэта сцвярджаць.

Кныровіч таксама адзначыў, што Беларусь значна перавышае рэкамендаваную Сусветнай арганізацыяй аховы здароўя (СААЗ) норму спажывання алкаголю, якая складае каля 6 літраў чыстага спірту ў год на душу насельніцтва. У Беларусі ж гэты паказчык перавышаны амаль у два разы.