Да снежня Yara прыме рашэнне пра далейшую супрацу з "Беларуськаліем"
13 жніўня Святлана Ціханоўская ў Осла сустрэлася кіраўніком кампаніі Yara Свейнам Торэ Халзетэрам.
Сустрэча прысвячалася абмеркаванню правоў чалавека, дэмакратыі і сітуацыі з рабочымі "Беларуськалію" — пастаўшчыка Yara ў нашай краіне, паведамляе прэс-служба Ціханоўскай.
Па выніках сустрэчы Ціханоўская заявіла, што кампаніі трэба спыніць дзейнасць у Беларусі "да таго часу, пакуль у нашай краіне не будуць адноўленыя законнасьць і дэмакратыя, пакуль не будуць безумоўна вызваленыя і рэабілітаваныя ўсе палітвязні". Яна дадала, што будзе радая ў будучыні бачыць кампанію ў якасці партнёра свабоднай і дэмакратычнай Беларусі.
Прэзідэнт і CEO кампаніі Yara Свейн Торэ Халзетэр паведаміў, што кампанія спрабуе выкарыстаць сваю прысутнасць у Беларусі дзеля захавання правоў чалавека, працуе пры падтрымцы некалькіх праваабарончых арганізацый і незалежных прафсаюзаў. Ён дадаў, што Yara гатовая спыніць супрацу з "Беларуськаліем": "Yara вырашыла перагледзець сітуацыю і да снежня прыняць рашэнне аб далейшай прысутнасці ў Беларусі. Тым часам мы працягнем выкарыстоўваць сваё становішча для далейшага прасоўвання пытання бяспекі рабочых і правоў чалавека".
Як распавядала Еўрарадыё, са снежня 2021 года Літва абяцала спыніць экспарт беларускіх калійных угнаенняў пра свае порты. Верагодна, гэтае рашэнне таксама паўплывала на пазіцыю нарвежскай кампаніі.
