Дзе беларусам атрымаць сучасную еўрапейскую адукацыю? Гайд Еўрарадыё

01/12/2023 - 15:33

Учиться можно бесконечно / pixabay.com

Не стаяць на месцы, крочыць далей, вучыцца, развівацца, а можа, арганізаваць нейкі свой сацыяльна важны праект? Усё гэта — нармальныя жаданні людзей, у якія б складаныя часы яны ні жылі. Сёння, нягледзячы ні на што, для беларусаў як унутры краіны, так і за мяжой існуюць розныя магчымасці. Каб доўга не шукаць, Еўрарадыё разам з галоўнай рэдактаркай adu.place Кацярынай Бунінай падрыхтавалі агляд самых цікавых адукацыйных прапаноў.

Атрымайце адукацыю ў ЕГУ

Еўрапейскі гуманітарны ўніверсітэт — гэта адзін з самых вядомых універсітэтаў, дзе студэнты займаюцца паводле мадэлі вольных навук. Тут можна навучыцца крытычна мысліць і глыбока разбірацца ў розных з’явах.

Акрамя вучобы ўніверсітэт прапануе міжнародныя актыўнасці і фінансавую падтрымку праектаў і самой вучобы. Дадаткова ў ЕГУ можна навучацца ў межах Летніх школ і адкрытых лекцый. Знайсці цікавую спецыяльнасць, даведацца пра выкладчыкаў і ўмовы паступлення можна на сайце.

Атрымайце паслядыпломную адукацыю ў Вольным беларускім універсітэце

Беларусы, якія прагнуць атрымаць сучасныя кампетэнцыі і веды пра грамадства, эканоміку і дзяржаву праз прызму еўрапейскага досведу і беларускіх выклікаў, могуць паступаць у Вольны беларускі ўніверсітэт.

У ім працуюць прафесары і выкладчыкі партнёрскіх еўрапейскіх і амерыканскіх ВНУ, а таксама беларускія выкладчыкі, пазбаўленыя магчымасці выкладаць у Беларусі.

Універсітэт прапануе больш за 21 курс: эканоміка, менеджмент, грамадства, лідарства, палітыка, права, гісторыя, краязнаўства і гэтак далей.

Курсы БВУ атрымліваюць сертыфікацыю ад еўрапейскіх партнёрскіх універсітэтаў.

Падрабязнасці глядзіце на сайце.

Дзе беларусам атрымаць сучасную еўрапейскую адукацыю? Гайд Еўрарадыё

Вучыцца — файна / be.ehu.lt

Вучыцеся паводле ўласнай праграмы!

Поўныя стыпендыі на ўдзел ў міждысцыплінарных даследаваннях прапануе беларусам Каледж Еўропы ў Натоліне. На навучанне тут могуць звярнуць увагу людзі з розным досведам і адукацыяй. Падчас вучобы можна падабраць такія курсы і прадметы, якія цікавыя менавіта вам. Дарэчы, за апошнія гады не было двух студэнтаў з аднолькавай праграмай.

Можна падавацца анлайн бясплатна да 16 студзеня 2024 году. Важна ведаць, што на сумоўі трэба хаця б крыху расказаць пра сябе на французскай мове. Нават калі ваш ўзровень мінімальны, вас могуць прыняць, калі вы падцягнеце яго да навучальнага году.

Падрабязнасці — на сайце.

Станьце прадпрымальнікам разам з EU4Youth

EU4Youth — гэта ініцыятыва, якая заахвочвае моладзь краін Усходняга партнёрства ўдзельнічаць у дэмакратычным жыцці. Можна падацца на грант, стыпендыі, а таксама атрымаць тэхнічную дапамогу.

У 2024 годзе ў беларусаў будзе магчымасць прайсці курс электроннага навучання прадпрымальніцкім навыкам і крэатыўнаму мысленню. Інструмент самаацэнкі для маладых прадпрымальнікаў на ўкраінскай мове дасяжны ўжо цяпер.

Таксама ўжо цяпер можна падацца на грант Green House for social innovators. Мэта праекта — умацаваць сацыяльныя прадпрыемствы ў Грузіі, Беларусі і Украіне, якія акцэнтаваныя на ўстойлівыя зялёныя і лічбавыя сацыяльныя бізнес-мадэлі, прыцягненне ментараў, інвестараў, а таксама праграмы міжнароднага абмену.

Напішыце даследаванне разам з SALT Support for Advanced Learning and Training

SALT Support for Advanced Learning and Training — гэта праграма, дзякуючы якой можна атрымаць студэнцкія стыпендыі, даследчыцкія групавыя гранты, паўдзельнічаць у стажыроўках для выкладчыкаў, а яшчэ прайсці моўныя курсы. Ужо цяпер набіраюць ахвочых на акадэмічныя стыпендыі для беларускіх даследчыкаў, выкладчыкаў і дактарантаў.

Падавацца можна як з Беларусі, так і з іншых краін.

Можна атрымаць стыпендыі на:

— супрацоўніцтва з замежнымі калегамі, каб стварыць курс або навучальны план, выкладаць, а таксама праводзіць лекцыі і прэзентацыі;
— даследаванні ў пэўнай галіне ў ВНУ або даследчым цэнтры, у тым ліку на час у бібліятэках і архівах, палявыя даследаванні (збор звестак), а таксама міжнароднае супрацоўніцтва для стварэння рэцэнзаванай публікацыі;
— неаплатную стажыроўку з боку ўніверсітэта або даследчага інстытута.

Ахвочыя павінны адправіць заяўку да 15 снежня.

Таксама можна атрымаць акадэмічныя групавыя гранты на даследаванні ў любым навуковым кірунку. Дэдлайн — 22 студзеня 2024 года. Падрабязнасці глядзіце на сайце.

Рэалізуйце сацыяльны праект разам з Social Camp

Незалежна ад свайго месца жыхарства беларусы, зацікаўленыя ў развіцці краіны і сувязях з ёй, могуць далучыцца да каманды адукацыйна-ментарынгавага праекта Social Camp.

У 2023-2024 можна прайсці некалькі курсаў:

“Адвакацыя”;
“Сацыяльны праект: ад ідэі да рэалізацыі”;
“Сацыяльнае прадпрымальніцтва”;
“Распакоўваем актывізм”;
“Сторытэлінг: тэорыя і практыка”.

Заняткі зоймуць усяго некалькі гадзін на тыдзень і будуць праходзіць паўтара месяца.

Бонус праекта ў тым, што удзельнік заўсёды можа папрасіць дапамогі ў ментараў. Яны падзеляцца досведам, як вырашаць грамадска значныя праблемы, рэалізоўваць сацыякультурныя праекты, атрымліваць веды пра спецыфіку прафесійнага асяроддзя ў новай краіне знаходжання, як пашырыць кантакты ў лакальнай прафесійнай супольнасці і гэтак далей.

Важная ўмова — праект, над якім вы працуеце, павінен быць сацыяльным.

Таксама Social Camp экспертна і фінансава падтрымлівае ідэі, накіраваныя на развіццё лакальных супольнасцяў. Напрыклад, можна атрымаць мікрагрант ад 5 да 20 тысяч еўра.

Набор на другі семестр пачынаецца ў снежні 2023 году. Таксама можна падаць заяўку на ментарынг. Падрабязнасці пра крытэрыі адбору і форму падачы заявак шукайце на сайце праекта.

Пракладзіце MOST паміж Беларуссю і Еўропай

Мэту палепшыць паразуменне паміж спецыялістамі з ЕС і Беларусі, дапамагаючы ім убачыць адно ў адным надзейных партнёраў, дапамагае праграма MOST+.

Яна падтрымлівае спецыялістаў і спецыялістак, якія працуюць у пэўных прафесійных сектарах: грамадства, культура, бізнес, адукацыя, ахова здароўя, устойлівае развіццё. Можна паехаць на стажыроўку ў краіны ЕС як самастойна, так і з групай.

Падрабязнасці — тут.

Станьце маладым еўрапейскім амбасадарам

“Наша галоўная мэта — данесці інфармацыю пра супрацоўніцтва ЕС з краінамі — усходнімі партнёрамі, а таксама разгледзець крытычныя пытанні, такія, як дэзінфармацыя, правы чалавека, пашырэнне правоў і магчымасцей моладзі і іншыя”.

Так кажуць пра сябе маладыя еўрапейскія дыпламаты. Акрамя пабудовы мастоў, удзельнікі праграмы дапамагаюць павысіць грамадзянскую актыўнасць. Для гэтага маладыя людзі ладзяць імпрэзы афлайн і анлайн. Сярод іх — варкшопы, канферэнцыі, культурныя актыўнасці, нэтворкінг. Як далучыцца да гэтай цікавай кампаніі, глядзіце на сайце.

Зрабіце SALTO

Праграма для моладзі SALTO аб’ядноўвае некалькі магчымасцяў: Erasmus+, European Solidarity Corps, Young people & youth workers, EU, Programme Countries, EaP, Neighbouring Partner Countries. Рэгулярны апдэйт па ўсіх імпрэзах можна знайсці па спасылцы.

Таксама на сайце дасяжная бібліятэка інструментаў. Варта стварыць профіль, а потым атрымліваць усю інфармацыю адсюль. Агульную інфармацыю пра праекты шукай тут.