Ecolines выбачыліся перад мінчанкай, якую высадзілі з аўтобуса на ўскрайку Прагі

Ecolines выбачыліся перад беларускай Дыянай Качаргіной, якую 4 лістапада высадзілі з аўтобуса на ўскрайку Прагі. "Адказ адпраўлены на мінулым тыдні. Прабачэнні прынесеныя, выплачаная кампенсацыя", — паведамілі Еўрарадыё ў латвійскім офісе кампаніі, які займаецца разглядам скаргаў.

"Я сумелася і не здолела ўпэўніць сцюардэсу дагартаць пашпарт да майго "Шэнгена", бо яна вельмі ціснула на мяне”, — тлумачыць дзяўчына. А было ўсё так. Увечары 4 лістапада 16-гадовая мінчанка Дыяна Качаргіна сядае ў Празе ў аўтобус Ecolines, які мусіць давезці яе да Варшавы. Аднак праз некалькі хвілінаў сцюардэса спыняе аўтобус і высаджвае дзяўчыну. На думку супрацоўніцы Ecolines, у пашпарце пасажыркі адсутнічае Шэнгенская віза.

"Яна пабачыла маю брытанскую візу і чамусьці не захацела гартаць пашпарт далей. Некалькі разоў паўтарыла: "Як вы ўвогуле сюды ўехалі?" — а таксама пра тое, што будуць праблемы, — распаваядае Еўрарадыё Дыяна Качаргіна. — Аўтобус спазняўся, яна вельмі спяшалася. І, хаця ў пашпарце быў сапраўдны "Шэнген", які дзейнічае да траўня 2017 года, спыніла аўтобус на ўскрайку Прагі і высадзіла мяне. Нават не дала часу апрануцца".

Дзяўчына ў шоку. За сем дзён да здарэння яе візу праверылі на беларуска-польскай мяжы, праз якую яна — таксама аўтобусам Ecolines — заехала ў Шэнгенскую зону. Дыяна тэлефануе сяброўцы, якая жыве ў Празе, і ўся ў слязах вяртаецца на аўтавакзал. У мінскім офісе Ecolines, дзе мама набыла Дыяне квіткі, на яе тэлефанаванні не адказваюць, а на прамым мабільным нумары аўтобуса ўвесь час працуе нямецкі аўтаадказчык.

Пасля вяртання ў Беларусь Дыяна і яе мама занеслі скаргу ў мінскі офіс Ecolines. У ім яны запатрабавалі ў кампаніі прабачэнняў, а таксама кампенсацыі кошту квіткоў і дадатковых выдаткаў, якія панесла сям'я пасажыркі: гэта грошы на харчаванне, незапланаваную начоўку ў Варшаве і маральныя страты. Па словах Дыяны, з імі размаўлялі непрыязна. Прэтэнзію перанакіравалі ў літоўскі офіс кампаніі — той рэйс, з якога знялі дзяўчыну, выконваў літоўскі перавозчык.

"Спярша яны заявілі, што будуць разглядаць скаргу цягам 30 дзён, — распавядае Дыяна. — Але, калі пачаўся розгалас у інтэрнэце, яны напісалі нам паведамленне з прабачэннямі, і паабяцалі кампенсаваць страты, пра якія мы заявілі. Таксама нам паведамілі, што супрацоўніцу, праз якую мяне ссадзілі з аўтобуса, адхілілі ад працы".

У мінскім офісе Ecolines Еўрарадыё пацвердзілі, што сям'я пасажыркі ўжо атрымала адказ на прэтэнзію. Аднак яго зместа там не ведалі — таксама як і ў літоўскім аддзяленні кампаніі. Аднак у латвійскім офісе Ecolines, дзе разглядаюцца скаргі пасажыраў, нам пацвердзілі: інцыдэнт у Празе сапраўды быў, і кампанія прызнала сваю віну. "Адказ адпраўлены на мінулым тыдні. Прабачэнні прынесеныя, выплачаная кампенсацыя", — дадалі ў Ecolines.