Генералы і прапагандысты засумавалі: беларусы ім не пішуць
Азаронка пасадзілі за стол як мага далей ад Шведа / prokuratura.gov.by
У “камісію па вяртанні”, якую стварыў рэжым Аляксандра Лукашэнкі, за месяц паступіла не больш за дзясятак зваротаў. Прапагандысты прызналіся ў гэтым самі. 1 красавіка генпракурор Андрэй Швед хваліўся 56 зваротамі (хаця і гэта няшмат). 28 красавіка ён сказаў, што ў камісію паступіла "больш за 60 зваротаў". Пад старшынством генпракурора ў пятніцу прайшло пасяджэнне згаданай камісіі. І генералы, і прапагандысты былі сумныя. Генпракуратура анансуе, што яе праца "будзе працягнута".
Камісія па вяртанні ў РБ палітуцекачоў пачала працу ў пачатку 2023 года. Генпракуратура запусціла адмысловы сайт, праз які можна ў яе звярнуцца. Палітуцекачы павінны самі растлумачыць, чаму асцерагаюцца вярнуцца. Таксама ад іх чакаюць, што яны пакаюцца, прынясуць публічныя прабачэнні і кампенсуюць "прычыненую шкоду".
Рэпрэсіі ў Беларусі не выклікаюць даверу да ініцыятывы рэжыму. У сакавіку Святлана Ціханоўская заклікала беларусаў-палітуцекачоў не давяраць прапагандзе Лукашэнкі: "Дадому мы ўсе абавязкова вернемся, але толькі тады, калі спыняцца рэпрэсіі і запануе сапраўдны, справядлівы закон".
