Ціханоўская расказала, калі палітуцекачы вернуцца ў Беларусь

Святлана Ціханоўская пракаментавала масавыя затрыманні ў Беларусі і працу так званай камісіі "па вяртанні на радзіму", якую стварыў рэжым Аляксандра Лукашэнкі. "Зараз да сваякоў беларусаў, якія пераехалі ў іншыя краіны дзеля ўласнай бяспекі, сталі прыходзіць прадстаўнікі рэжыму і ўгаворваць людзей паўплываць на сваіх родных і папрасіць іх вярнуцца дадому, — піша кіраўніца Аб'яднанага Пераходнага Кабінета Беларусі. — Але рэжыму не патрэбныя людзі. Яму патрэбныя падаткаплацельшчыкі, якія будуць пакорліва ўтрымліваць чыноўнікаў, сілавікоў і ўвесь вялізны рэпрэсіўны апарат. А самі людзі — з іх думкамі, марамі, прапановамі, спробамі палепшыць жыццё ў краіне — не, не патрэбныя".

Ціханоўская заклікае беларусаў-палітуцекачоў не давяраць прапагандзе Лукашэнкі, размаўляць з роднымі і блізкімі, расказваць ім праўду пра тое, што адбываецца. "А дадому мы ўсе абавязкова вернемся, але толькі тады, калі спыняцца рэпрэсіі і запануе сапраўдны, справядлівы закон", — падкрэслівае палітык.

Згаданая камісія пачала працу ў пачатку 2023 года. За гэты час у яе звярнулася крыху больш за два дзясяткі чалавек.