Іванец расказаў пра "самую вялікую памылку, якую дапусцілі ў постсавецкі час"

Міністр адукацыі Беларусі Андрэй Іванец расказаў пра "самую вялікую памылку, якую дапусцілі ў постсавецкі час". Ён перакананы, што гэта падзел адукацыі і выхавання.

"Тады сказалі: выхаваннем зоймемся пасля ўрокаў, — цытуе словы Іванца прэс-служба міністэрства. — І гэта стала татальнай памылкай. Таму зараз мы павінны праводзіць урокі так, каб вучань і пасля іх быў выхаваным".

У выдавецкім доме "Педагагічная прэса" гаворка ішла пра аптымізацыю дзейнасці цэнтраў дадатковай адукацыі.

"Па-першае, гурткі павінны адпавядаць патрэбам школьнікаў. Перад тым як адкрыць аб’яднанне па інтарэсах, варта вывучыць меркаванні дзяцей і бацькоў, які напрамак ім цікавы, і толькі пасля гэтага ажыццяўляць набор, — гаварыў міністр. — Па-другое, весці такія заняткі павінны педагогі дадатковай адукацыі, а не школьныя настаўнікі. І па-трэцяе, павінна быць адпаведная матэрыяльная база".