Кляшчоў у Беларусі стала ў паўтара разу больш. Але паліваць лясы ДДТ — не выйсце

25/06/2024 - 16:57

Будзьце асцярожныя / Еўрарадыё

— Чаго яны так плодзяцца? Можа, дзяржава нарэшце што-небудзь зробіць? — рэагуюць беларусы на навіну пра чарговае нашэсце кляшчоў.

Сітуацыя сур'ёзная: паводле паведамлення Міністэрства аховы здароўя, кляшчоў у Беларусі гэтым летам у 1,6 разу больш, чым летась. А значыць, імавернасць падчапіць ад іх інфекцыю таксама высокая.

— Няма дакладных звестак, чаму кляшчоў у Беларусі робіцца больш, — расказвае Еўрарадыё біёлаг Віталіна Лабанава. — Ёсць тэорыя, што гэта звязана са змяненнем клімату. Павышэнне тэмпературы ў выніку глабальнага пацяплення стварае спрыяльнае асяроддзе для размнажэння.

Некаторыя даследчыкі звязваюць сітуацыю з павелічэннем колькасці грызуноў, крывёю якіх сілкуюцца павукападобныя. Але я б не сказала, што іх стала больш.

Клещей в Беларуси стало в полтора раза больше. Но поливать леса ДДТ — не выход

Біёлаг Віталіна Лабанава / Архіў

Ці вядзецца ў Беларусі супрацькляшчовая апрацоўка?

Паводле інфармацыі Міністэрства лясной гаспадаркі, лясы ў Беларусі ад кляшчоў спецыяльна не апрацоўваюцца — "занадта вялікія аб'ёмы ляснога фонду".

— Да таго ж гэта дорага і доўга, — дадае Віталіна Лабанава.

— Самі працаўнікі лесу карыстаюцца рэпелентамі і выконваюць правілы асабістай бяспекі: носяць светлую шчыльную вопратку, запраўляюць нагавіцы ў абутак. Калі трымацца іх прыкладу, усё будзе добра, — раяць у Мінлясгасе.

Гінуць не толькі мэтавыя насякомыя або, як у выпадку з кляшчамі, павукападобныя, але і ўсе астатнія. У тым ліку насякомыя-апыляльнікі, а яшчэ птушкі, рэптыліі і ўсе, хто імі сілкуецца. Такім чынам, парушаюцца харчовыя ланцугі.

У клетках жывых арганізмаў назапашваюцца шкодныя рэчывы, і нават калі яны потым не паміраюць, пачынаюцца праблемы з іх узнаўленнем.

— І наогул, апрацоўваць тэрыторыі нейкімі агульнымі атрутнымі інсектыцыдамі — гэта жудасна шкодна, — дадае суразмоўца.

Дык ці трэба ўмешвацца дзяржаве?

— Хай нашы лепш наогул нічога не робяць, чым робяць абы-як, — мяркуе Віталіна Лабанава. — Бо калі яны пачнуць рабіць, можа быць яшчэ горш.

Спецыялістка тлумачыць: каб выкарыстоўваць такія атрутныя прэпараты, як інсектыцыды, трэба рабіць мноства даследаванняў, "якія ў Беларусі рабіць не будуць".

— У выніку лясы будуць апрацоўваць рэчывам, якое падасца дзяржаве лепшым ці таннейшым. А тое, што нейкі жывы від пры гэтым здохне, для ўладаў не будзе вырашальным довадам.

Карацей, я б не тапіла за выкарыстанне інсектыцыдаў і апрацоўку імі лясоў. Да гэтага стаўлюся адмоўна.

Робім прышчэпкі

— Гэтае пытанне вывучаецца, — каментуюць сітуацыю з кляшчамі ў Рэспубліканскім цэнтры гігіены і эпідэміялогіі. — Калі вы перажываеце за сябе, зрабіце прышчэпку ад кляшчовага энцэфаліту. Падрабязнасці можна ўдакладніць у тэрытарыяльных цэнтрах гарадоў, якія вас цікавяць.

Дарэчы, на Еўрарадыё ўжо выходзіў матэрыял пра тое, як абараніцца ад кляшчоў. Перачытайце гэты тэкст — і вы даведаецеся не толькі пра тое, як зрабіць прышчэпку, але і пра тое, як выратаваць сваіх хатніх жывёл і нават застрахавацца ад укусу кляшча.